“სვანეთში უნდა გაითიშოს უკანონო მაინინგები, რომელმაც ქსელი დაამძიმა და თუ საჭიროება მოითხოვს, უნდა დაყადაღდეს კიდეც”, – ამის შესახებ საქართველოს კომუნიკაციების მარეგულირებელი ეროვნული კომისიის თავჯდომარე დავით ნარმანიამ განაცხადა.
მისივე თქმით, მესტიის მუნიციპალიტეტის მიერ მოხმარებული ელექტროენერგია 17-18 მეგავატია, რაც მეზობელი სამი
მუნიციპალიტეტის მიერ მოხმარებულ ენერგიას აღემატება.
აღსანიშნია, რომ ელექტროენერგიის გაზრდილი მოხმარების ფონზე, გასულ კვირას ადგილობრივ მოსახლეობას კრიპტოვალუტების ე.წ. მაინერების გამორთვისკენ მეტიის მერიამაც მოუწოდა. მერიის ინფორმაციით, გასულ წლებთან შედარებით ელექტროენერგიის დღევანდელი მოხმარება 237%-ით არის გაზრდილი. მესტიის თვითმმართველობის პათოსს ნათია თურნავაც უერთდება.
„90-იან წლებში სვანეთის მოსახლეობასთან შეთანხების შედეგად, მოსახლეობა არ იხდის ელექტროენერგიის ტარიფს. კომერციული სექტორი მინიმალურ დონეზე იხდის, თუმცა აქაც ამოღების მაჩვენებელი ძალიან დაბალია. ეს კი განაპირობებს იმას, რომ ქსელის დატვირთვის და გადატვირთვის პირობებში, რომელიც დიდწილად მაინინგებით არის დატვირთული, განაპირობებს მაღალ მოხმარებას, 17-18 მეგავატია ბოლო პერიოდში მესტიის მუნიციპალიტეტში ელექტროენერგიის მოხმარება, რაც ჯამურად აღემატება მეზობელი 3 მუნიციპალიტეტის – ხობის, წალენჯიხის, ჩხოროწყუს ელექტროენერგიის მოხმარებას. უნდა მოხდეს რეაგირება მაინინგების შეზღუდვის ნაწილში, რათა ობიექტებს, რომლებსაც სჭირდებათ ყველაზე მეტად ენერგია – ტურისტულ ობიექტებს, სასტუმროებს, საბაგიროებს, უწყვეტად მიეწოდოთ“, – განაცხადა დავით ნარმანიამ.
სემეკ-ის თავმჯდომარე მიიჩნევს, რომ თუ მოსახლეობა ელექტროენერგიის საფასურს არ გადაიხდის, მაშინ კომპანია „ენერგო- პრო ჯორჯიას” ვერავინ მოთხოვს მესტიისთვის ელექტროენერგიის ხარისხიან და უწყვეტ მიწოდებას.
„კომპანია ახორციელებს ინვესტიციას და არ აქვს მოგება, რაც მარეგულირებელ წესებთან წინააღმდეგობაში მოდის. უნდა ვიცოდეთ, რომ თუ არ გადავიხდით ელექტროენერგიის საფასურს, გვექნება წყვეტები, იქნება ავარიები, და ა.შ. ისევ ტურიზმსა და მოსახლეობის კომფორტზე აისახება ეს ყველაფერი“, – აღნიშნა დავით ნარმანიამ.