პარტია „მოქალაქეების“ წევრი, ლევან იოსელიანის ინფორმაციით, „ნაციონალური მოძრაობა“ სააკაშვილის საქმეზე დროებითი საგამოძიებო კომისიის შესაქმნელად ხმების საჭირო რაოდენობას ვერ აგროვებს.
როგორც იოსელიანი აცხადებს, საგამოძიებო კომისიასთან დაკავშირებით ინიციატივას პარტია „მოქალაქეები“ მხარს არ დაუჭერს.
„მოვისმინე პოლიტიკური ჯგუფებისა და პარტიების განცხადებები. რამდენადაც ჩემთვის ცნობილია, უკვე მოცემულობაა, რომ ამ საგამოძიებო კომისიისთვის საკმარისი ხმები არ გროვდება. ეს ლოგიკურია, რასაც დასთეს, იმას მოიმკიო.
„ნაციონალურმა მოძრაობამ“ არც ერთ მნიშვნელოვან საკითხზე არ ითანამშრომლა ოპოზიციის დანარჩენ ნაწილთან, მათ შორის ინსპექტორის საკითხზე არ შემოვიდნენ და მხარი არ დაუჭირეს პროტესტს, რომელსაც დანარჩენი ოპოზიცია პარლამენტში ახმოვანებდა. ჩვენი მხარდაჭერა ამ ინიციატივას არ ექნება, რადგან ეს არის ერთი პოლიტიკური პარტიის დღის წესრიგიდან გამომდინარე ინიციატივა და ყველა საგამოძიებო კომისია, რომელიც მანამდე იქნა დაინიცირებული, ჩავარდა მათი პარლამენტში არ გამოცხადებით. მათ მხარი არ დაუჭირეს. გაგახსენებთ, 5 ივლისის საქმეს და ასე შემდეგ. ეს ყველაფერიც რომ გვერდზე გადავდოთ, მიუხედავად ამ ყველაფრისა, არ მიმაჩნია, რომ ერთი პოლიტიკური პარტიის დღის წესრიგი უნდა იყოს მთელი პოლიტიკური სპექტრის დღის წესრიგი.
როდესაც საუბარია თუნდაც შესაძლო ვინმეს წამებაზე, მაშინ აქვე უნდა ვისაუბროთ სხვა ფაქტებზე. უამრავი გამოუძიებელი ფაქტი არსებობს ადამიანების წამების, მათ შორის მიხეილ სააკაშვილის პრეზიდენტობის პერიოდში. ასეთი ორმაგი სტანდარტებით ჩვენ ვერ ვიხელმძღვანელებთ. თუ დავუჭერთ ამის შექმნას მხარს, მაშინ დავუჭერთ მხარს სხვა საგამოძიებო კომისიასაც, რომელიც გამოიძიებს „ნაციონალური მოძრაობის“ პერიოდში ჩადენილ ფაქტებს და გამოძიება რაღაც ჭეშმარიტებას დაადგენს. უამრავი ფაქტი არის გამოუძიებელი და უამრავი ადამიანი მოგვმართავს, რომ „ქართულმა ოცნებამ“ არ გამოიძია მათი საქმე“, – განაცხადა ლევან იოსელიანმა.
„ნაციონალურ მოძრაობაში“ აცხადებენ, რომ საპარლამენტო ბოიკოტს შეწყვეტენ, თუ მიხეილ სააკაშვილის საქმეზე საგამოძიებო კომისია შეიქმნება. კომისიის შექმნის შესახებ პროექტის ინიცირების უფლება აქვს, მათ შორის, პარლამენტის შემადგენლობის არანაკლებ 1/5-ს ანუ 30 დეპუტატს, ხოლო შექმნაზე გადაწყვეტილებას იღებს სრული შემადგენლობის 1/3, შესაბამისად, საჭიროა 50 დეპუტატის მხარდაჭერა.