ევროკავშირის უმაღლესი კომისარი საგარეო საქმეთა და უსაფრთხოების პოლიტიკის საკითხებში ჟოზეფ ბორელი ყაზახეთში განვითარებულ მოვლენებთან დაკავშირებით განცხადებას ავრცელებს.
„შეშფოთებულები ვართ იმ ძალადობით, რომელიც ყაზახეთში მშვიდობიან საპროტესტო გამოსვლებს მოჰყვა. ძალიან ვწუხვართ ადამიანური დანაკარგის გამო და მკაცრად ვგმობთ ძალადობის აქტებს. მნიშვნელოვანია შემდგომი ესკალაციებისა და ძალადობის ყოველგვარი წაქეზების თავიდან აცილება, რათა არეულობა სხვა მიზნებისთვის არ იყოს გამოყენებული. ჩვენ მზად ვართ კრიზისის მშვიდობიანი გზით მოსაგვარებლად დახმარებისთვის. გარე სამხედრო მხარდაჭერამ პატივი უნდა სცეს ყაზახეთის სუვერენიტეტსა და დამოუკიდებლობას, ისევე როგორც ყველა მოქალაქის ფუნდამენტურ უფლებებს. მოვუწოდებთ ყაზახეთის ხელისუფლებას, დაიცვან თავიანთი ვალდებულებები ამ რთულ დროს, მათ შორის, პატივი სცენ თავიანთი მოქალაქეების უფლებებსა და ფუნდამენტურ თავისუფლებებს, განსაკუთრებით, შეკრების თავისუფლებას, გამოხატვის თავისუფლებასა და მედიის თავისუფლებას“, – აღნიშნულია ჟოზეფ ბორელის განცხადებაში.
ბოლო დღეების განმავლობაში, ყაზახეთში ვითარება რამდენჯერმე შეიცვალა. პირველ რიგში, მომიტინგეებმა მთავრობის გადადგომას მიაღწიეს. ამავდროულად, ნურსულთან ნაზარბაევმა მისი ბოლო მნიშვნელოვანი თანამდებობაც დატოვა. 5 იანვრის ღამეს, თითქოს მომიტინგეები აკონტროლებდნენ მთლიანად ქვეყნის დედაქალაქს. თუმცა, მოგვიანებით, სამხედროები ალმათიში დაბრუნდნენ და „ანტიტერორისტული ოპერაცია“ წამოიწყეს.