ბადრი ჯაფარიძე ე.წ. ფულის გათეთრების საქმეზე გამოცხადებულ განაჩენს გამოეხმაურა. „ლელოს“ ლიდერმა პარტიის ცენტრალურ ოფისში გულშემატკივრებს მხარდაჭერისთვის მადლობა გადაუხადა, თუმცა აღნიშნა, რომ სასამართლოს დავის გაგრძელებას გეგმავენ, რადგან არ ეთანხმებიან იმ ფაქტს, რომ მოსამართლემ ჯაფარიძე, მამუკა ხაზარაძე და ავთანდილ წერეთელი თაღლითობაში დამნაშავეებად ცნო.
„რაც ახლა ვნახეთ ეს არის იმ თაღლითობის გაგრძელება, რომელსაც პროკურატურა მთელი ამ პერიოდის განმავლობაში ჩასდიოდა. იმიტომ რომ, ცხადია, არანაირი ნიშანწყალი არ ყოფილა არანაირი ფულის გათეთრების ან რაიმე დანაშაულის. მოსამართლემ შეცვალა ფულის გათეთრების მუხლი, გადააკვალიფიცირა ის მუხლით, რომელზეც ხანდაზმულობა ვრცელდება და ყოველგვარი პასუხისმგებლობისგან გაგვათავისუფლა. მაგრამ ჩვენ ამ გადაწყვეტილებას გავასაჩივრებთ, იმიტომ რომ არ ვეთანხმებით. არანაირი დანაშაული არ მომხდარა. არანაირი დანაშაულის ნიშანწყალი არ არსებობს. ეს იყო ბრძოლა ჩვენი ქვეყნისთვის უმნიშვნელოვანესი ინსტიტუტის გადასარჩენად, რომელიც გადავარჩინეთ, გავხადეთ ჩვენი ქვეყნის წარმატების სახე და ჩვენ იგივეს მივაღწევთ პოლიტიკაში. ჩვენი ქვეყანაა გახდება წარმატების სახე რეგიონში. ბრძოლა გრძელდება. ჩვენ გავასაჩივრებთ ამ გადაწყვეტილებას და მივიყვანთ ბოლომდე. სიმართლე დადგინდება“, – განაცხადა ჯაფარიძემ.