“ხალხმაც, სხვანაირად უნდა ამოიღოს ხმა, რომ გშია, გამოდი და თქვი, რომ გშია, ყოველგვარი პოლიტიკური მოტივაციის გარეშე” – ამის შესახებ „ერთიანი საქართველოს“ ლიდერმა, ნინო ბურჯანაძემ „პალიტრანიუსის“ ეთერში განაცხადა.
მისი თქმით, ხელისუფლების წინააღმდეგ საბრძოლველად ოპოზიცია სხვაგვარად უნდა იქცეოდეს და თუ ოპოზიციას უნდა, რომ მიაღწიოს ვადამდელ არჩევნებს, ამას სჭირდება ერთობა.
“ჯერჯერობით არ ჩანს რადარებზე ოპოზიციური ერთობა და შესაბამისად, არ ჩანს ის შედეგიც, რაც ამ ოპოზიციურმა ერთობამ უნდა მოიტანოს. არ იქნება ოპოზიციური ერთობა, არ იქნება ვადამდელი არჩევნები. ეს არის ორჯერ ორი ოთხი, ძალიან ნათელია ეს ჩემთვის. ოპოზიციაც სხვაგვარად უნდა იქცეოდეს დღევანდელ ვითარებაში და ხალხმაც ალბათ, სხვანაირად უნდა ამოიღოს ხმა. არ არის აუცილებელი მოგწონდეს ესა თუ ის პარტია, რომ გამოხვიდე. სოციალური პროტესტი იყოს და არა პოლიტიკური. რომ გშია, გამოდი და თქვი, რომ გშია, ყოველგვარი პოლიტიკური მოტივაციის გარეშე.
ზოგადად, ხელისუფლების წინააღმდეგ ბრძოლა, მითუმეტეს ისეთ ქვეყნებში, როგორიც საქართველოა, შესაძლებელია მხოლოდ და მხოლოდ მაშინ, როდესაც ოპოზიცია არის ერთიანი. ამიტომ, ჩემს პოზიციას ემთხვევა ბატონი სააკაშვილის პოზიციაც, რაც სწორი პოზიციაა, რადგან თუ ოპოზიციას უნდა, რომ მიაღწიოს ვადამდელ არჩევნებს ამას სჭირდება მხოლოდ ერთობა. გვერდზე გადაიდოს ყველანაირი განსხვავებები და ვადამდელი არჩევნები იქნას მოპოვებული“, – განაცხადა ნინო ბურჯანაძემ.