თუ უკრაინის ტერიტორიული მთლიანობის წინააღმდეგ თავდასხმა განხორციელდება, რუსეთს მასშტაბური ეკონომიკური და ფინანსური სანქციებით ვუპასუხებთ, – ამის შესახებ ევროკომისიის პრეზიდენტმა ურსულა ფონ დერ ლაიენმა განაცხადა. მისი თქმით, ტრანსატლანტიკური საზოგადოება მტკიცედ დგას ამ პოზიციაზე.
„ევროკავშირი რუსეთის უდიდესი სავაჭრო პარტნიორი და უმსხვილესი ინვესტორია. ეს სავაჭრო ურთიერთობა რუსეთისთვის გაცილებით უფრო მნიშვნელოვანია, ვიდრე ჩვენთვის. იმედი გვაქვს, უკრაინაზე თავდასხმა არ მოხდება. ჩვენთვის მიუღებელია რუსეთის მცდელობა, რომ ევროპა გავლენის სფეროებად დაყოს“, – განაცხადა ფონ დერ ლაიენმა.
აშშ-ის პრეზიდენტის განცხადებით, უკრაინაში სამხედრო ინტერვენციის შემთხვევაში რუსეთს კატასტროფა ელის. ჯო ბაიდენის თქმით, ვაშინგტონი რუსეთს ვითარების ესკალაციის შემთხვევაში ისეთ სანქციებს დაუწესებს, რაც მოსკოვს დღემდე არ უნახავს. მისივე თქმით, თუ ეს „მცირე შეჭრა“ იქნება დასავლეთის ქვეყნებს მოუწევთ მსჯელობა.