რომის პაპმა ფრანცისკემ უკრაინაში მშვიდობისთვის ლოცვის დღე წარმართა და დიალოგის მოწოდებით გამოვიდა. ინფორმაციას ამის შესახებ სააგენტო Reuters-ი ავრცელებს.
„გთხოვთ, უკრაინაში მშვიდობისთვის ილოცოთ და ეს ხშირად გააკეთოთ დღის განმავლობაში. ვიმედოვნებ, რომ ჭრილობების, შიშისა და განხეთქილების დაძლევა შესაძლებელი გახდება“, – აღნიშნა რომის პაპმა.
რომის პაპმა იმედი გამოთქვა, რომ ეს მუდარა მსოფლიო ლიდერების გულებამდე მივა, რათა დიალოგმა გაიმარჯვოს.
მან ასევე გაიხსენა, რომ მეორე მსოფლიო ომის დროს უკრაინაში ხუთ მილიონზე მეტი ადამიანი დაიღუპა და რომ უკრაინაში ხალხი შიმშილსა და სისასტიკეს განიცდიდა.
24 იანვარს, რომის პაპმა ფრანცისკემ ყოველკვირეული მიმართვისას უკრაინაში მზარდი დაძაბულობა აღნიშნა და ასევე დიპლომატიის გზის გამოყენების მოწოდებით გამოვიდა.
„მე შეშფოთებით ვადევნებ თვალს მზარდ დაძაბულობას, რომელიც უკრაინაში მშვიდობას ემუქრება და ევროპის უსაფრთხოებას ეჭვქვეშ აყენებს, რასაც კიდევ უფრო სერიოზული შედეგები მოჰყვება“, – აღნიშნა რომის პაპმა.
რუსეთის მიერ უკრაინის საზღვართან ჯარების დაგროვებამ დასავლეთის შეშფოთება გამოიწვია, რომ რუსეთი უკრაინაში შეიძლება შეიჭრას. სამხედრო ინტერვენციის შემთხვევაში, დასავლეთი კრემლს მასშტაბური ეკონომიკური სანქციებით ემუქრება. მოსკოვმა განაცხადა, რომ უკრაინაში შეჭრას არ აპირებს.