“ის, რაც ხდება აფხაზეთში, ეს არ ემსახურება აფხაზეთის ინტერესებს, – ამის შესახებ „კვირას“ პრესკლუბში გამართულ პრესკონფერენციაზე საქართველოს პარლამენტის ვიცე-სპიკერმა ზვიად ძიძიგურმა განაცხადა.
ზვიად ძიძიგური აფხაზეთში მიმდინარე მოვლენებს მნიშვნელოვანს უწოდებს, თუმცა თვლის, რომ საქართველო ამ პროცესებში არ უნდა ჩაებას.
„ის, რაც ხდება აფხაზეთში, რა თქმა უნდა, მნიშვნელოვანია ჩვენთვის, მაგრამ ჩვენ ამ პროცესებში ვერც და არც უნდა ჩავერიოთ.
აფხაზებში, ჩვენს დებში და ძმებში ნელ-ნელა ყალიბდება აზრი, რომ, რაც იქ ხდება, მათთვის სასურველი არ არის, თუმცა ჩვენ მხოლოდ ის უნდა გავაკეთოთ, რომ საქართველო იყოს სამაგალითო ქვეყანა კულტურითაც, ეკონომიკითაც და პოლიტიკითაც და მიმზიდველი გავხადოთ ის ოსებისთვისაც და აფხაზებისთვისაც”, – განაცხადა ზვიად ძიძიგურმა „კვირას“ პრესკლუბში გამართულ პრესკონფერენციაზე.
ზვიად ძიძიგურმა ყურადღება გაამახვილა ამერიკის ხელისუფლების მხრიდან საქართველოს მხარდაჭერაზე და აღნიშნა, რომ საქართველოს დღეს ამერიკის შეერთებული შტატების ხელისუფლების სახელით აქვს ორი პარტიის მხარდაჭერა.