არასამთავრობო ორგანიზაციებთან ჩვენ აქტიურად ვითანამშრომლებთ ყველა იმ საკითხთან დაკავშირებით, რომელიც ეხება ჩვენს დემოკრატიულ, ეკონომიკურ, სოციალურ განვითარებას, ასევე საგარეო პოლიტიკას, – ამის შესახებ ჟურნალისტებს პარლამენტის თავმჯდომარე ირაკლი კობახიძემ, არასამთვარობო ორგანიზაციებთან გამართული შეხვედრის დასრულების შემდეგ განუცხადა.
“არასამთავრობო ორგანიზაციების წარმომადგენლებთან გამართული შეხვედრა ძალიან საინტერესო და მნიშვნელოვანი იყო. ჩვენ მათ ის გეგმები გავაცანით, რომლითაც მუშაობას ვიწყებთ. წარმოდგენილი იყო კონკრეტული ინიციატივები. შევჯერდით შემდგომი თანამშრომლობის გეგმებზე, პერსექტივებზე. მათთან თანამშრომლობა მჭიდრო რეჟიმში გაგრძელდება“, – განუცხადა ჟურნალისტებს ირაკლი კობახიძემ.
საპარლამენტო უმრავლესობამ, კერძოდ, კომიტეტის თავმჯდომარეებმა, პირველმა ვიცე-სპიკერმა და თავად პარლამენტის თავმჯდომარემ სხვადასხვა სფეროში გასატარებელ რეფორმებთან დაკავშირებით არასამთავრობო ორგანიზაციების წარმომადგენლების მოსაზრებები და წინადადებები მოისმინეს. შეხვედრა მედიისთვის დახურული იყო.