ლატვია კვლავ იღებს გაზს რუსეთიდან – ამის შესახებ RBC ბუნებრივი აირის ტრანსპორტირებისა და შენახვის ლატვიური ოპერატორის Conexus Baltic Grid-ის მონაცემებზე დაყრდნობით წერს. როგორც ცნობილია, რუსეთის ფედერაციიდან გაზი ქვეყანაში შემოდის ესტონეთში მდებარე გაზსაზომი სადგურ “ლუჰამაას” გავლით.
ლატვიამ უარი თქვა რუსული გაზის მიწოდებაზე აპრილის დასაწყისში მას შემდეგ, რაც გადაწყვიტა არ შეესრულებინა მოსკოვის მოთხოვნები რუსული გაზის საფასურის რუბლით გადახდაზე. თუმცა, ივნისში ლატვიის გაზის გადაცემის სისტემის მთავარმა ოპერატორმა Latvijas gāze-მ განაახლა შესყიდვები. ამავდროულად, Latvijas gāze-მა ხაზგასმით აღნიშნა, რომ ნედლეულის შეძენა პირდაპირ “გაზპრომიდან” არ ხდება და ტრანზაქციები ევროში ხორციელდება.
ივლისის ბოლოს რუსულმა სახელმწიფო კორპორაცია “გაზპრომმა” შეწყვიტა გაზის მიწოდება ლატვიისთვის “გაზის გაყვანის პირობების დარღვევის გამო”. “გაზპრომმა” არ დააკონკრეტა რა სახის დარღვევაზეა საუბარი.
14 ივლისს ლატვიის სეიმმა მიიღო გადაწყვეტილება, 2023 წლის 1 იანვრიდან მთლიანად აიკრძალოს ბუნებრივი აირის მიწოდება რუსეთიდან. 2021 წელს რიგამ ამ ნედლეულის დაახლოებით 90 პროცენტი რუსეთის ფედერაციიდან შეიძინა.
მოსკოვის მოთხოვნის შესაბამისად, 1 აპრილიდან “არამეგობრულმა ქვეყნებმა”, რომელთა სიაში რუსეთის ხელისუფლებამ შეიყვანა ევროკავშირის წევრი სახელმწიფოები, “გაზპრომბანკის” მეშვეობით გაზის მიწოდების ანგარიშსწორება უნდა განახორციელონ ხელშეკრულების ვალუტის სავალდებულო კონვერტაციით – რუსულ რუბლებში – წინააღმდეგ შემთხვევაში ექსპორტი შეწყდება. პოლონეთმა, ბულგარეთმა, ფინეთმა, ნიდერლანდებმა, დანიამ უარი თქვეს ამ პირობების შესრულებაზე, რის შემდეგაც რუსეთმა შეწყვიტა გაზის მიწოდება ამ ქვეყნებისთვის.