საპარლამენტო უმრავლესობის წევრის გივი მიქანაძის განცხადებით, საზოგადოებაში მუხტის აწევის მიზნით რადიკალური ოპოზიციის დაანონსებული გეგმა წინასწარ მარცხისა და კრახისთვისაა განწირული.
მისი თქმით, მორიგი არჩევნები საქართველოში ჩატარდება 2024 წლის ოქტომბერში, როგორც კანონმდებლობითაა დადგენილი.
„ისინი ფიქრობენ, აწიონ მუხტი, რომ თითქოსდა, ოპოზიციის რადიკალური ფრთის მიერ წარმოდგენილი გეგმა, რადგანაც არ იყო გაზიარებული, ეს არის 12-პუნქტიანი გეგმის შეუსრულებლობა და ამით დააანონსონ აქციები. ეს არის წინასწარ მარცხისა და კრახისთვის განწირული ღონისძიება.
კიდევ ერთხელ ვიტყვით, რომ მორიგი არჩევნები საქართველოში ჩატარდება 2024 წლის ოქტომბერში, როგორც კანონმდებლობითაა დადგენილი. ამ ქვეყანას სჭირდება კონსოლიდაცია იმ მთავარი მიზნის ირგვლილივ, რასაც ამ ქვეყნის შემდგომი უსაფრთხოება, განვითარება და ევროპული მომავალი ჰქვია“, – განაცხადა მიქანაძემ.
„გირჩი-მეტი თავისუფლების“ ლიდერმა ზურაბ ჯაფარიძემ, ტელეკომპანია „ფორმულას“ ეთერში განაცხადა, რომ მასობრივი პროტესტის შემთხვევაში ბევრი ნაბიჯის გადადგმა შეიძლება, მათ შორის შენობების აღება.