ყოფილი ჟურნალისტის, ამჟამად პოლიტიკოსის, ელისო ჩაფიძის ცხოვრება 7 თვის წინ აბსოლუტურად შეიცვალა. ქორწინებიდან 3 წლის შემდეგ ექიმმა ახარა, რომ დედა გახდებოდა. ის და მისი ქმარი, დათო მიქაბერიძე, თებერვალში ტყუპ ბიჭს ელოდებიან. ელისო 42 წლის გახლავთ, ბატონი დათო – 46 წლის და, როგორ ამბობენ, ამ ასაკში ეს მოლოდინი კიდევ უფრო მძაფრია.
მომავალმა დედამ თავისი სიხარულის შესახებ “სარკესთან” ინტერვიუში ისაუბრა. გთავაზობთ ნაწყვეტებს ინტერვიუდან:
“საკმაოდ ბევრი წვალებისა და მკურნალობის შემდეგ თებერვალში ტყუპ ბიჭს ველოდებით. ეს საოცარი შეგრძნებაა. ამან ჩემს ცხოვრებაში ბევრი რამ შეცვალა. ადამიანების, სამყაროს, საკუთარი არსებობის მიმართაც კი შემეცვალა დამოკიდებულებები. ყოველთვის მინდოდა, ჩემი ქვეყნისთვის გამეზარდა შვილები, მათთვის წამეკითხა ვაჟა-ფშაველას ლექსები, სულიერება და განათლება მიმეცა, მათთვის დავხარჯულიყავი, ახლა სწორედ ამის შესაძლებლობა მეძლევა და ეს ძალიან მიხარია.
ბავშვობიდან ვოცნებობდი, 5 შვილი გამეჩინა, ამდენს, მე მგონი, ვერ ვასწრებ, მაგრამ 2 შვილიც ძალიან დიდი საჩუქარია. ამისათვის, პირველ რიგში, მადლობა უფალს და შემდეგ ჩემს მკურნალ ექიმს თათია ტუღუშს. მან ოცნება რეალობად მიქცია. ის ამისთვის არანაკლებად იბრძოდა, ვიდრე მე და ჩემი ოჯახი.
…სექტემბერში შევიტყვეთ რომ ტყუპი ბიჭები არიან, ერთად სხედან, ერთმანეთს ეთამაშებიან ხოლმე. ახლა უკვე ექოსკოპიაზე მხოლოდ სქესს კი არა, მათ ნაკვთებს ვხედავთ, როგორ აღებენ პირს და ა. შ. ეს მართლა საოცრებაა! გენეტიკაში ჩემი მხრიდან ტყუპები არავინ გვყავს, მაგრამ დათოს მხრიდან არიან.
– როგორ ზრუნავს თქვენი ქმარი ორსულ ცოლზე?
– დათო ყოველთვის ძალიან თბილი და ყურადღებიანი იყო, მაგრამ ახლა უფრო მეტად ამჟღავნებს ამ თვისებებს. თუ სადმე ვარ წასასვლელი, ყველგან მივყავარ, ცდილობს, ფრთხილად ატაროს მანქანა, ოჯახში ყველაფრით გვამარაგებს, რაც საჭიროა და მაქსიმუმს აკეთებს, რაც მამაკაცმა შეიძლება ცოლისთვის გააკეთოს.
დათო მიქაბერიძე, ელისო ჩაფიძის მეუღლე:
– ალბათ ყველა ქართველი მამაკაცისთვის მამობა ბედნიერებაა. ტყუპი ბიჭების მამობა გარკვეულ პასუხისმგებლობას, ძალიან დიდ სიხარულს მანიჭებს. ძალიან კარგად ვხედავთ, როგორი აუცილებელია ჩვენი ქვეყნისთვის კარგი ვაჟკაცების, მომავალი თაობის აღზრდა. ამისთვის მზად ვარ, ელისოც მაქსიმალურად დამიდგება გვერდში და თავს გავართმევთ, რომ სამშობლოს კარგი ვაჟკაცები აღვუზარდოთ. ძალიან ბედნიერი ვარ და მადლობა ელისოს, რომ ასეთი ბედნიერება მაჩუქა და დარჩენილი წლები გამიხალისა, მეტი სტიმული მომცა, რომ უფრო მეტი ვაკეთო ჩემი ოჯახისთვის, ჩემი ქვეყნისთვის.
ჟურნალი “სარკე”