“არანაირი გამოსვლები არ იქნება, რადგან გამოსვლებს აწყობს ხალხი და არა პოლიტიკური პარტიები”

არანაირი გამოსვლები არ იქნება, რადგან გამოსვლებს აწყობს ხალხი და არა პოლიტიკური პარტიები, – ამის შესახებ რეჟისორმა გოგა ხაინდრავამ გადაცემაში „იმედი LIVE“ რადიკალური ოპოზიციის მიერ დაანონსებულ საპროტესტო აქციების გამართვაზე საუბრისას განაცხადა.

„ეს გეგმა არსებობდა და ჩავარდა. სექტემბრის ბოლოა, ოქტომბერი და მერე ზამთარი იწყება. არანაირი გამოსვლები არ იქნება, რადგან გამოსვლებს აწყობს ხალხი და არა პოლიტიკური პარტიები. პოლიტიკურ პარტიები, თუ მაგის ნიჭი და უნარი შესწევდეთ და ორგანიზაციული შესაძლებლობები, ამ პროტესტის სათავეში ექცევიან და პროტესტს მიმართავენ იმ მიმართულებით, რაც იმ პოლიტიკურ ვითარებას სჭირდება. საზოგადოებაში არანაირი პროტესტი არ არის. ჩემი 30-წლიანი გამოცდილებიდან მინდა გითხრათ, ხელოვნურად ამას ვერ გამოიწვევ. ეს ხალხში უნდა დაიბადოს და თუ შენ ნიჭიერი პოლიტიკოსი ხარ, შენ ამას იგრძნობ და ამ პროტესტს იმ გზაზე წაიყვან, რომელიც შენთვის იქნება საინტერესო“, – განაცხადა ხაინდრავამ.