ამასთან დაკავშირებით აზრთა სხვადასხვაობა მაშინაც იყო, როდესაც შეხვდა [ნიკა მელია დავით კეზერაშვილს] და მაშინაც, როცა ბოლოს ისაუბრა იმაზე, რომ არანაირი კონტაქტი არ სურს კეზერაშვილთან. ამაზეც და იმაზეც, აზრთა სხვადასხვაობა ყოველთვის იყო პარტიაში, – ამის შესახებ „ნაციონალური მოძრაობის„ წევრმა, ანა წითლიძემ განაცხადა.
კითხვაზე – უკავშირდებოდა თუ არა მელია-კეზერაშვილის შეხვედრა ფინანსურ საკითხებს, წითლიძე ასე პასუხობს:
„არ ვიცი რას უკავშირდებოდა. თუ ვინმეს აწყობს, რომ მთელი ამ ხნის განმავლობაში, ამაზე იგებოდეს ნიუსები, ამაზე ვსაუბრობდეთ და იყოს ეს განხილვის თემა, ეს არის მხოლოდ „ქართული ოცნება“.
„ნაციონალურ მოძრაობაში“ დაპირისპირება და ბრძოლა გავლენის მოსაპოვებლად გრძელდება. რა როლი აქვს ამ პროცესში დავით კეზერაშვილს – კვლავ მთავარ კითხვად რჩება. ამ კითხვას პასუხი ნაწილობრივ ლევან ხაბეიშვილმა უკვე გასცა. ერთ-ერთ გამოცემასთან ინტერვიუში მან დაადასტურა, რომ გარკვეულ აქტივობებს და ზოგიერთ ოპოზიციონერს სწორედ კეზერაშვილი აფინანსებს. „ქართული ოცნებისთვის“ თავდაცვის ყოფილი მინისტრის ფინანსები ქართულ პოლიტიკაში შავ ფულს ნიშნავს.