სამართლებრივად და თეორიულად ეს შესაძლებელია, მაგრამ ამას წყვეტს ის სახელმწიფო, სადაც იმყოფება კონკრეტული პატიმარი, – ასე უპასუხა კულტურის მინისტრმა და ვიცე-პრემიერმა, თეა წულუკიანმა გადაცემაში „იმედი LIVE“ კითხვას, რომელიც მიხეილ სააკაშვილის შეეხებოდა. კერძოდ, უკრაინული მხარის განცხადებას, რომელიც ექსპრეზიდენტის მოწმის სახით უკრაინაში გადაყვანას ითხოვს.
„მე დღეს რა თქმა უნდა არ მაქვს ის კომპეტენცია, რომ ეს თუ ის პოზიცია დავიჭირო, მაგრამ მაქვს ჩემი მოსაზრება. კერძოდ იმის შესახებ, რომ პენიტენციური სამსახური ასეთ მდგომარეობაში მყოფ ავადმყოფს, თუკი დავუშვებთ იმას, რასაც თვითონ და ოჯახი ამბობენ, რომ სიმართლეა, წარმატებით უვლიდა და მზრუნველობდა. ამიტომ მე არ მგონია, რომ იქ მკურნალობის პრობლემა იყოს. ასევე კითხვის ნიშნის ქვეშ არის, რამდენად სწორია პაციენტის მიერ საკუთარი თავის სამედიცინო მდგომარეობის შეფასება – ეს რა თქმა უნდა, ექიმმა თქვას. ექიმი რომ შევიდეს და შეაფასოს, ლიცენზირებული უნდა იყოს, ისინი, ვინც მას აფასებენ და ექიმები მას არ აკლია, ამბობენ, რომ მდგომარეობა სრულად სამედიცინო კონტროლს ექვემდებარება. არის თუ არა ის ტრანსპორტაბელური, ეს ცალკე საკითხია. თვლის თუ არა საქართველოს სახელმწიფო, რომ ის უნდა გადაიყვანონ უკრაინაში დაკითხვის მიზნით, ეს მეორე საკითხია და ამაზე უფლებამოსილმა უწყებამ უნდა უპასუხოს. მე კი ვთვლი, რომ ამის საჭიროება არ არსებობს, ვინაიდან სააკაშვილი ძალიან ბევრი წელი იქ ჰყავდათ, მრავალი წლის განმავლობაში მიმდინარეობდა მისი გაძევების საქმეზე გამოძიება და ნებისმიერ დროს შეეძლოთ ეს ადამიანი დაეკითხათ მანამ, სანამ შეფუთულს გამოგვიგზავნიდნენ საქართველოში. ეს უფრო ჰგავს საბაბს ჰგავს, ვიდრე საჭიროებას, რომ როგორმე სააკაშვილი დაბრუნდეს იქ, საიდანაც ჩამოვიდა“, – განაცხადა წულუკიანმა.