საქართველო მზად არის, რუსეთს ტუ-154-ის ავიაკატასტროფის მსხვერპლთა ძებნაში დაეხმაროს, თუ რუსული მხარე შესაბამისი თხოვნით მიმართავს. ამის შესახებ რუსეთთან ურთიერთობების საკითხებში საქართველოს პრემიერ-მინისტრის სპეციალურმა წარმომადგენელმა, ზურაბ აბაშიძემ “რია ნოვოსტისთან” საუბრისას განაცხადა.
„რუსულ მხარეს არ მოუმართავს ასეთი თხოვნით. ნებისმიერ შემთხვევაში, ჰუმანიტარული დახმარების გაწევა ნებისმიერი სახელმწიფოს ვალდებულებაა. ჩვენ გაგვაჩნია გამოცდილება, როდესაც შესაბამისი სამსახურები ყაზბეგის რაიონში მეწყერის დროს გაუჩინარებული პირების ძებნის ოპერაციაში მონაწილეობდნენ. ასე, რომ მსგავსი გამოცდილება გაგვაჩნია და საჭიროების შემთხვევაში, შესაბამისი სამსახურები ერთვებიან. მაგრამ ვიმეორებ, აღნიშნულ მომენტში ჩვენთვის არავის მოუმართავს მსგავსი თხოვნით“, – განაცხადა ზურაბ აბაშიძემ.
რუსეთის თავდაცვის სამინისტროს თვითმფრინავმა, რომელიც სოჭიდან სირიის ქალაქ ლატაკიაში მიემგზავრებოდა, კატასტროფა 25 დეკემბერს განიცადა.
თვითმფრინავის ბორტზე 91 ადამიანი იმყოფებოდა. სამხედროების გარდა თვითმფრინავში იყვნენ ცეკვის და სიმღერის ანსამბლის წევრები და ცხრა ჟურნალისტი. ისინი სირიაში დისლოცირებული რუსული ბაზისთვის ახალი წლის მილოცვას აპირებდნენ.