კრემლთან დაკავშირებული ოლიგარქები – ისკანდარ მახმუდოვი და ანდრეი ბოკარევი ლატვიაში ბიზნესსაქმიანობას დღემდე აგრძელებენ – რიგაში კომპანიებს როგორც პირადად, ასევე, მესამე პირების მეშვეობით აკონტროლებენ და იღებენ დაფინანსებას ევროკავშირის გრანტების სახით.
ჟურნალისტური გამოძიება The Insider-მა ჩაატარა.
2021 წლის მდგომარეობით, მახმუდოვი და ბოკარევი რიგის ელექტრომანქანათმშენებლობის ქარხანას (RER) აკონტროლებენ – ლატვიის მსხვილ საწარმოს, რომელიც უშვებს ელექტრომოწყობილობას მატარებლებისთვის, მეტროს ვაგონებისა და საზოგადოებრივი ტრანსპორტისთვის.
ლატვიის კომერციული რეესტრის მონაცემებით, 2021 წლის მდგომარეობით, RER-ის აქციების 36%-ს რუსული იურიდიული პირი – Holding TransComponent-ი აკონტროლებდა. კრემლის ოლიგარქები მასში 20-20% ფლობდნენ. თუმცა, როგორც გამოცემამ გაარკვია, კომპანიის 46%-ს მოსკოვის Krona Grup-ი ფლობს, რომლის უკან ასევე ეს ორი ოლიგარქი დგას.
რუსი ოლიგარქების მიერ კონტროლირებადი ლატვიური კომპანია მთელ ევროპაში მუშაობს: მაგალითად, მაისში მან ჩეხეთში წარმოადგინა ახალი ელექტროძრავა ტროლეიბუსებისა და ელექტროავტობუსებისთვის.
გარდა ამისა, RER იღებს დაფინანსებას ევროკავშირისგან – ლატვიის საინვესტიციო და განვითარების სააგენტოსა და ლატვიის ეკონომიკის სამინისტროს გრანტების სახით.
როგორც The Insider-ი აღნიშნავს, რუსეთში ეს ოლიგარქები ფლობენ კომპანიებს, რომლებიც რუსეთის თავდაცვის სამინისტროს მიმწოდებლები არიან. ადრე ისინი ფლობდნენ წილებს “კალაშნიკოვის” კონცერნში, ახლა კი აგრძელებენ დიზელის ძრავების მიწოდებას რუსული ხომალდებისთვის “კოლომენსკის ქარხნის” გავლით.
მახმუდოვი და ბოკარევი რამდენიმე სისხლის სამართლის საქმეში იყვნენ ბრალდებულნი. საქმე ეხებოდა კრიმინალური ფულის გათეთრებას. კერძოდ, გერმანიაში 2007 წლის აღძრულ სისხლის სამართლის საქმეში ისინი ფიგურირებენ, როგორც “იზმაილოვსკაიას” ორგანიზებული დანაშაულებრივი ჯგუფის საერთო ფონდის მფლობელები, ხოლო 2008 წლის ესპანეთის სისხლის სამართლის საქმის მასალებში ნათქვამია, რომ ტამბოვსკო-მალიშევსკაიას ორგანიზებული დანაშაულებრივი ჯგუფის ფული, ასევე, ოლიგარქების კომპანიების მეშვეობით გათეთრდა.