„ნაციონალური მოძრაობის“ წევრი ლევან ბეჟაშვილი აცხადებს, რომ დამოუკიდებელი ამერიკელი ექსპერტის მიერ მიხეილ სააკაშვილისთვის ჩატარებული ლაბორატორიული კვლევები, ანალიზები და დასკვნა წარედგინება სასამართლოს.
მისივე თქმით, სააკაშვილის მიერ უარის თქმა ანალიზების ჩატარებაზე, ნიშნავს იმას, რომ ის არ ენდობა სისტემას.
„სტრატეგია აღმაშენებლის“ წარმომადგენლის, პაატა მანჯგალაძის თქმით, დევიდ სმიტის დასკვნაში პირდაპირ წერია, რომ სააკაშვილის სხეულში აღმოჩენილია მძიმე მეტალები, რომლებიც იქ ვერ აღმოჩნდებოდა მკურნალობის შედეგად. მისივე თქმით, ეს პარამეტრები სააკაშვილის სიცოცხლისთვის საზიანო ნიშნულთან არის მისული.
პენიტენციური სამსახურის განცხადებით, მიხეილ სააკაშვილის მოწამვლის შესახებ განცხადებები მიმართულია სახელმწიფოს ინტერესების დასაზიანებლად, სიტუაციის ხელოვნურად დამძიმება წარმოადგენს სასამართლო განხილვების წინ დაძაბული ფონის შექმნის მცდელობას.