რადიკალური ოპოზიციის მცდელობა იყო პოლიტიკურად მორჩილი სახალხო დამცველი ჰყოლოდა ქვეყანას, რაც პირიქით, უკან გადადგმული ნაბიჯი იქნებოდა ევროინტეგრაციის გზაზე, – ამის შესახებ საპარლამენტო უმრავლესობის წევრმა, დეპუტატი რატი იონათამიშვილმა 12-პუნქტიანი გეგმის შესრულებაზე საუბრისას განაცხადა.
„საზოგადოება და ჩვენი საერთაშორისო პარტნიორები ხედავენ, რომ „ქართული ოცნების“ მიერ უზრუნველყოფილი სამუშაო პროცესი 12 პუნქტის შესრულებასთან დაკავშირებით ნამდვილად იყო პროაქტიული, პასუხისმგებლიანი და ნაყოფიერი. ცხადია, რჩება გამოწვევები, რომელიც ასევეა შესასრულებელი. თუნდაც, სახალხო დამცველის არჩევასთან დაკავშირებით, მაგრამ აქაც ყველა დარწმუნდა, რომ „ქართული ოცნება“ იყო ის, ვინც ცდილობდა სახელმწიფოებრივი და ღირებულებებზე დაფუძნებული არჩევანი გაეკეთებინა. ამ შემთხვევაშიც ჩვენ რადიკალური ოპოზიციის მხრიდან ვნახეთ, რომ მათი მცდელობა იყო პოლიტიკურად მორჩილი სახალხო დამცველი ჰყოლოდა ჩვენს ქვეყანას, რაც პირიქით, უკან გადადგმული ნაბიჯი იქნებოდა ევროინტეგრაციის გზაზე“, – განაცხადა იონათამიშვილმა.
12-პუნქტიანი რეკომენდაციის ნაწილი შესრულებულია, თუმცა რადიკალური ოპოზიცია გარკვეულ საკითხებზე, პოზიციას არ ცვლის, რის გამოც მმართველ გუნდსა და ოპონენტებს შორის კონსენსუსი ვერ შედგა. პარლამენტმა საშემოდგომო სესია დაასრულა თუმცა, მმართველ გუნდს იმედი აქვს, საგაზაფხულო სესიაზე, შეუთანხმებელ საკითხებზე, შეთანხმებას მაინც მიაღწევს.