არ დამავიწყდება, როცა 2008 წლის ომი დასრულებული არ იყო, ჩვენი ქვეყნის იმდროინდელი პრემიერ-მინისტრი სტამბოლში ბარებიდან ვერ გამოგვყავდა – ერთი ბარიდან მეორეში დადიოდა საქეიფოდ და სირცხვილით სად დავმალულიყავით, არ ვიცოდით, – მიმართა უმრავლესობის წევრმა ზვიად კვაჭანტირაძემ „ნაციონალურ მოძრაობას“ .
„სწორედ თქვენი ხელისუფლება იყო ის ხელისუფლება, რომლის დეკლარირებული კურსი, რეალური კურსისგან ყოველთვის განსხვავდებოდა. ვერავინ ვერ გადამარწმუნებს მე პირადად იმაში, რომ თქვენი ხელისუფლებაში ყოფნის პერიოდში გადადგით მართლაც რეალური ნაბიჯები იმისთვის, რომ საქართველოს მოსახლეობას გაცილებით უფრო მეტი მხარდაჭერა ჰქონოდა იმ პროცესების მიმართ, რასაც ჩვენ ევროკავშირისკენ ინტეგრაციასა და NATO-სკენ ინტეგრაციას ვეძახით. აღარ ვლაპარაკობ იმ ტრაგედიაზე, რომელიც 2008 წელს დამართეთ ჩვენს ქვეყანას. გინდა დღეს ჩათრევა თუ ჩაყოლა დაარქვიათ, ვერცერთ შემთხვევაში ვერ აიცილებთ იმ პოლიტიკურ პასუხისმგებლობას, რომელსაც რუსეთთან ომის წარმართვა ჰქვია. ამას ჩვენი ხალხი თავად გადაწყვეტს. ყველას ძალიან კარგად გვახსოვს, როგორ იმართებოდა ქვეყანა ომის წინ, ომის დღეებში და ომის შემდეგ. მე არც ის არ დამავიწყდება, ჩვენი ქვეყნის იმ დროინდელი პრემიერ-მინისტრი, ომი დასრულებულიც კი არ იყო და ბარებიდან ვერ გამოგვყავდა, სტამბოლში. ერთი ბარიდან მეორეში დადიოდა საქეიფოდ და სირცხვილით სად დავმალულიყავით არ ვიცოდით, ამას გეუბნებით პირდაპირ. გვარი არც მახოვს იმ პრემიერ-მინისტრის, მგონი არც სჯობს გახსენებად“, – განაცხადა კვაჭანტირაძემ.
აღსანიშნავია, რომ 2008 წლის აგვისტოს ომის დროს მიხეილ სააკაშვილის მთავრობას ლადო გურგენიძე ხელმძღვანელობდა. იმ პერიოდში ზვიად კვაჭანტირაძე საქართველოს გენერალური კონსული იყო თურქეთის რესპუბლიკაში.