ნაციონალური საკალათბურთო ასოციაციის ALL STAR-ის შუალედურ მონაცემებში ზაზა ფაჩულიას მეორე ადგილს საქართველოში აშშ-ის საელჩოც ეხმაურება.
“ზაზა მეორე ადგილზეა და სწორედ ახლაა ყველაზე მეტი მონდომება საჭირო. ერთად მივავლინოთ კაპიტანი ვარსკვლავთა მატჩზე! ხმის მიცემა შესაძლებელია nba.com/vote გვერდიდან, გუგლის საძიებო გვერდიდან, ტვიტერიდან და, რა თქმა უნდა, ფეისბუქიდან. დაპოსტეთ საჯაროდ დღეში ერთხელ”,-ნათქვამია ამერიკის საელჩოს ფეისბუქზე.
საქართველოს ნაკრების კაპიტანი ზაზა ფაჩულია თავის კონფერენციაში ხმების მიხედვით მე-2 ადგილს იკავებს.
ზაზა ფაჩულიას ამ დროისთვის 439 675 ხმა აქვს და მხოლოდ “გოლდენ სტეიტიდან” თავისი თანაგუნდელი კევინ დურანტი უსწრებს.
გასულ წლებში სასტარტო ხუთეულების გამოვლენა მხოლოდ გულშემატკივართა პრეროგატივა იყო, შერჩევის ახალი პრინციპის მიხედვით კი, ხმების 50% გულშემატკივართა აქტიურობიდან გამოთვლიან, ხოლო 25-25% კალათბურთელებისა და მედიის წარმომადგენლების ხმებით გადანაწილდება.
ამასთან, არ შეცვლილა ხმის მიცემის წესი და ქართველ გულშემატკივარს ზაზა ფაჩულიას მხარდაჭერა 16 იანვრის ჩათვლით კვლავ შეუძლია.