ძალიან გთხოვთ ყველას თავი დაანებეთ, საკუთარ პარტიაში აწყობს შოუს, – ამის შესახებ საპარლამენტო უმცირესობის წევრმა ელენე ხოშტარიამ პარლამენტში განაცხადა, სადაც ფრაქცია „ნაციონალური მოძრაობის“ სამუშაო ოთახში ერთმანეთს სიტყვიერად დაუპირისპირდნენ თანაფრაქციელები – ნიკა მელია, სერგო რატიანი და აკაკი ბობოხიძე.
მხარეებმა ერთმანეთს პარტიის დაშლაში დასდეს ბრალი.
„ძალიან გთხოვთ ყველას თავი გაანებეთ, თავის პარტიაში აწყობს შოუს“, – მიმართა თანაფრაქციელებს ელენე ხოშტარიამ.
ხოშტარიას განმარტებით, ფრაქცია ”ნაციონალური მოძრაობის” დღევანდელი სხდომა, სადაც თავმჯდომარის გადაყენების საკითხზე უნდა ემსჯელათ, გიგი უგულავას თხოვნით გადაიდო. ხოშტარიას განმარტებით, უგულავა თანაგუნდელებს სთხოვს, რომ ყველა რესურსი ბოლომდე იყოს გამოყენებული კონსულტაციებისთვის.
“ადამიანები, რომლებიც პარტიის ერთიანობაზე და ”ნაციონალური მოძრაობის” იდეებზე საუბრობენ, საკუთარ პარტიაში და საკუთარ ფრაქციაში ასეთ იაფფასიან შოუს აწყობენ. ეს მხოლოდ იმაზე მეტყველებს, რომ მათ არაფერი ამოძრავებთ გარდა იმისა, გახლიჩონ პარტია. დღეს კიდევ უფრო ცხადი გახდა, რომ ნიკა მელია ვერ იქნება იმ გუნდის ლიდერი, რომელსაც ასეთი მოვარდნებითა და შეურაცხყოფით ელაპარაკება”, -განაცხადა ელენე ხოშტარიამ.