ტერორიზმი ვერასოდეს გაიმარჯვებს, ის მხოლოდ გააძლიერებს ჩვენს ერთგულებას იერუსალიმისადმი და ჩვენი რწმენისადმი, – ამის შესახებ საქართველოში ვიზიტად მყოფმა ისრაელის პრეზიდენტმა რუვენ რივლინმა საქართველოს პრეზიდენტ გიორგი მარგველაშვილთან შეხვედრის შემდეგ გამართულ ერთობლივ ბრიფინგზე განაცხადა.
„იერუსალიმი – ეს არის ქალაქი, სადაც ჩვენ ვგლოვობთ ტერორიზმის მსხვერპლ ახალგაზრდა მამაკაცებს და ქალბატონებს. ტერორიზმი ვერასდროს გაიმარჯვებს“, -განაცხადა ისრაელის პრეზიდენტმა.
როგორც ისრაელის პრეზიდენტმა აღნიშნა, მას სჯერა, რომ საქართველო და ისრაელი ერთობლივი მუშაობის წყალობით ურთიერთობებს კიდევ უფრო გააღრმავებენ.
„ჩემი ვიზიტის დროს ველოდები, რომ უფრო მეტს შევიმეცნებ თქვენი ქვეყნის შესახებ და როგორ შეიძლება კიდევ უფრო გავაღრმავოთ მეგობრობა და თანამშრომლობა. ვაფასებ იმ დისკუსიებს, რომელიც გვქონდა დღეს დილით და მოუთმენლად ველოდები დანარჩენ შეხვედრებს. ჩვენ ბევრ რამეს მივაღწიეთ ერთობლივი მუშაობის წყალობით და მჯერა, რომ მეტის მიღწევა შეგვიძლია. გილოცავთ, რომ თქვენ ჩამოაყალიბეთ ახალი მთავრობა. მე მჯერა, რომ ეს არის კარგი დრო, კიდევ უფრო დავაახლოვოთ ჩვენი ეკონომიკები და სამრეწველო პოტენციალი, ასევე გავაღრმავოთ კავშირები ჩვენს ერებს შორის“, – განაცხადა რუვენ რივლინმა.