ამ წუთებში თავდაცვისა და საგარეო ურთიერთობათა კომიტეტების ერთობლივ სხდომაზე ფიზიკურ დაპირისპირებას ადგილი აღარ აქვს, თუმცა სხდომა ვერ იწყება, რადგან კომიტეტის თავმჯდომარის ადგილი ოპოზიციონერ დეპუტატებს, სალომე სამადაშვილსა და ანა ნაცვლიშვილს აქვთ ბლოკირებული.
ისინი კომიტეტის ხელმძღვანელებს სხდომის გახსნისა და კანონპროექტების განხილვის საშუალებას არ აძლევენ. საკომიტეტო დარბაზთან კი აქციის მონაწილეებმა პირდაპირ განაცხადეს, რომ მათი მიზანია დღეს „ხალხის ძალის“ კანონპროექტების განხილვა ვერ მოხდეს.
პარლამენტში, ე.წ. აგენტების შესახებ კანონპროექტების განხილვამდე ფიზიკური შეხლა-შემოხლა მას შემდეგ დაიწყო, რაც ოპოზიციის წარმომადგენლებმა სხდომაზე მედიისა და არასამთავრობო სექტორის იმ წარმომადგენლების შეყვანა სცადეს, რომლებიც სიაში არ იყვნენ. ამ ფაქტს მანდატურის სამსახურთან დაპირისპირება მოჰყვა.
ოპოზიციის წარმომადგენლებს შორის იყვნენ ლევან ხაბეიშვილი და გიორგი ვაშაძე.
აღსანიშნავია, რომ ყველას, ვინც კომიტეტს სხდომაზე დასწრების თხოვნით წინასწარ მიმართა და სიაში იყო შეყვანილი, ამის საშუალება მიეცა. მანდატურმა კი მხოლოდ იმ პირებს უთხრა უარი, რომლებზეც საშვი არ იყო დაშვებული, რადგან მათ კომიტეტს სხდომაში მონაწილეობის შესახებ წინასწარ არ შეატყობინეს.
დაპირისპირება საკომიტეტო სხდომათა დარბაზშიც გაგრძელდა. ხმაური და შეძახილები ამ ეტაპზეც არ შეწყვეტილა.
14 თებერვალს „ხალხის ძალამ“ საქართველოს პარლამენტში „უცხოური გავლენის გამჭვირვალობის შესახებ“ კანონპროექტი დააინიცირა. ამერიკის სახელმწიფო დეპარტამენტის სპიკერმა, ნედ პრაისმა პარლამენტში წარდგენილი კანონპროექტი დაიწუნა და მასში გარკვეული საფრთხე დაინახა.
21 თებერვალს კი „ხალხის ძალის“ ლიდერმა დიმიტრი ხუნდაძემ განაცხადა, რომ მოძრაობა კანონპროექტის ალტერნატიულ ვერსიასაც წარადგენს, რომელიც ამერიკული კანონის ზუსტი თარგმანი იქნება. კანონპროექტის ორივე ვერსია ვენეციის კომისიაში გაიგზავნება.