ძალიან ხშირად კეთდება განცხადებები, რომელიც, სამწუხაროდ, ობიექტური არაა, თუმცა, საბედნიეროდ, იმავე მიმართულებიდან ძალიან ხშირად ხდება სიმართლეზე ხაზგასმა. იმის აღიარება, რომ სააკაშვილის საკითხის პოლიტიზება არ უნდა მოხდეს და რომ ეს პოლიტიკის მიღმაა, არის ძალიან კარგი და მისასალმებელი, – ასე გამოეხმაურა ფრაქცია „ქართული ოცნების“ თავმჯდომარე მამუკა მდინარაძე PACE-ს მონიტორინგის კომიტეტის თანამომხსენებლების განცხადებას სააკაშვილის ჯანმრთელობის მდგომარეობის დეპოლიტიზაციის აუცილებლობის თაობაზე.
„ეს მაგონებს იმ მიდგომას, როდესაც ევროკავშირმა თავადვე გამოაქვეყნა კრიტერიუმები, რომლის მიხედვითაც თურმე მოწინავე პოზიციაზე ვართ და დადასტურდა, რომ საქართველოს უსამართლოდ არ მიეცა კანდიდატის სტატუსი. ახლა ამის გაგრძელებას ვხედავთ: ერთი მხრივ, სიმართლის აღიარებას, მეორე მხრივ, რუსული გეგმის შესრულების მცდელობას. ჩვენი ოპონენტების მიერ დაანონსებულ გეგმას რომ მივყვეთ, ეს არის კანდიდატის სტატუსის ვერ და არ მიღება, ხელისუფლების ცვლილება, მეორე ფრონტის გახსნა, რაც აუცილებლად რუსული შედეგით დასრულდება. შემიძლია გარანტია მოგცეთ, რომ ამ გეგმაზე უარის თქმის შემთხვევაში საქართველო უპირობოდ მიიღებს კანდიდატის სტატუსს. თუ ჩვენი ოპონენტები უარს იტყვიან ამ რუსული გეგმის შესრულებაზე, საქართველო მიიღებს კანდიდატის სტატუსს. ჩვენი გეგმები დაემთხვევა ერთმანეთს დეპოლარიზაციასთან დაკავშირებითაც, რადიკალიზმის ხარისხის შემცირებასთან დაკავშირებითაც. ჩვენმა ოპონენტებმა უნდა აღიარონ, რომ საქართველო იმსახურებს კანდიდატის სტატუსს, რომ რეალურად სრულდება რეკომენდაციები. თუ ამ სიმართლეს აღიარებენ, საქართველო მიიღებს კანდიდატის სტატუსს“, – აცხადებს მდინარაძე.
27-29 მარტს საქართველოში განხორციელებული ვიზიტის შემდეგ, ევროპის საბჭოს საპარლამენტო ასამბლეის (PACE) მონიტორინგის კომიტეტის თანამომხსენებლებმა, კლოდ კერნმა და ედიტ ესტრელამ ხაზგასმით აღნიშნეს, რომ სააკაშვილის საუკეთესო ინტერესებიდან გამომდინარე, მნიშვნელოვანია მისი ჯანმრთელობის მდგომარეობის დეპოლიტიზაცია.