საქართველოს პრეზიდენტის, გიორგი მარგველაშვილის რეზიდენციაში სახელმწიფო დროშის დღე აღინიშნება, რომელზეც პრეზიდენტი აფხაზეთის ომის მონაწილე ვეტარანებსა და იუნკერებს მასპინძლობს და მათ ჯილდეობს გადასცემს.
პრეზიდენტი სახელმწიფო დროშის დღესთან დაგავშირებით სიტყვით გამოვიდა.
“საქართველოს ყველა მოქალაქეს ვულოცავ დღევანდელ დღეს, დროშის დღეს. დღეს, როდესაც ვზეიმობთ ჩვენი სახელმწიფოებრიობის მთავარ სიმბოლოს. დღეს, როდესაც აღვნიშნავთ იმ უმნიშვნელოვანეს ღირებულებებს, რასაც ჰქვია დამოუკიდებლობა და თავისუფლება. მაღლა აღმართული დროშა არის სიმბოლო სახელმწიფოებრიობის, ამ სახელმწიფოში მცხოვრები ხალხის დამოუკიდებლობისა და თავისუფლების. სიმბოლოა იმის, რომ ჩვენ ერთმანეთთან და ყველას დასანახად აღვმართავთ დროშას იმისთვის, რომ ვთქვათ, ჩვენ გვაქვს უნარი, ვიყოთ თავისუფლები და დავიცვათ ეს თავისუფლება.
საქართველოს დროშა საუკუნეების წინ აღიმართა, როდესაც ჩვენმა წინაპრებმა შექმნეს დამოუკიდებელი სახელმწიფო. მაშინაც უშიშრად და თამამად აღმართავდნენ ამ ალამს. ამ დროშის გულისთვის და ჩვენი სახელმწიფოებრიობისთვის ასი ათასობით ჩვენმა წინაპარმა დადო თავი. მოიტანა დღევანდელ დღემდე სახელმწიფო, რომელმაც გაუძლო ჭირსა და ვარამს, უძლიერესი მტრების შემოსევას. ჩვენი დროშა მრავალი საუკუნის მატარებელია და მრავალი ჩვენი წინაპრის ღვაწლითა და სისხლით არის გაძლიერებული. თუმცა, როდესაც ჩვენ დღეს აღვმართავთ დროშას, არ ვიყურებით მხოლოდ წარსულში. ჩვენ ვიყურებით მომავალში. ჩვენ ყველას ნათლად ვამცნობთ იმ ძალას, რომელიც აღგვამართინებს ამ დროშას და ჩვენი სახელმწიფოს დაცვისა და გაძლიერების უნარს გვაძლევს.
დღეს მე მინდა, კიდევ ერთხელ გავუსვა ხაზი იმ ადამიანების ღვაწლს, რომლებმაც ჩვენს თაობაში, ჩვენს რეალობაში თავისი თავი შესწირეს ჩვენი სახელმწიფოსა და ჩვენი დროშის სამსახურს. ვინც შეძლეს ურთულეს ვითარებაში შეენარჩუნებინათ ჩვენი სახელმწიფოებრიობა. ვინც იბრძოდა იმისთვის, რომ თბილისის თავზე სწორედ საქართველოს დროშა ფრიალებდეს, რომ საქართველოს კუთხეები ამ დროშით იყოს გაერთიანებული. დღეს აქ არიან ის ადამიანები, ვინც იბრძოდა ამ დროშისთვის, ვისი თანამებრძოლებიც დაეცნენ ამ ბრძოლაში, მათი ოჯახის წევრები, ვინც თავი შესწირა ჩვენს სახელმწიფოებრიობას.
სიმბოლურია, რომ დღეს აქ არიან ის ადამიანებიც, ვინც თავისი სამსახური სწორედ ქვეყნის დაცვას მიუძღვნა. დღეს აქ არის ის ახალი თაობა, ვინც გადაიბარებს დროშას და ვინც მომავალ თაობებშიც საუკუნეებში განმტკიცებულ ჩვენს სახელმწიფოს გააძლიერებს. ყველას გილოცავთ ამ მნიშვნელოვან დღეს. ყველას გისურვებთ გქონოდეთ ძალა, უნარი და შემწეობა, რომ ემსახუროთ ჩვენს სამშობლოს. ღმერთი ფარავდეს ჩვენს სამშობლოს”,- განაცხადა პრეზიდენტმა.