საქართველოს პარლამენტის თავმჯდომარემ გურიის მოსახლეობას და სრულიად საქართველოს შობა-ახალი წელი და კალანდობა მიულოცა.
ირაკლი კობახიძე პარლამენტის წევრებთან ერთად გურიაში იმყოფებოდა, სადაც კალანდობის სახალხო დღესასწაულს დაესწრო.
„პირველ რიგში, ვულოცავ ამ ლამაზ დღეს გურიას, გურულებს და გურიასთან ერთად სრულიად საქართველოს, კიდევ ერთხელ გილოცავთ შობა-ახალ წელს. პირველად ვიღებ მონაწილეობას ამ ლამაზ ღონისძიებაში და ეს ძალიან კარგი გრძნობაა. მინდა, კიდევ ერთხელ, ყველას მივულოცო შობა, ახალი წელი და ვუსურვო ბედნიერება და ყველაფერი საუკეთესო”, – განაცხადა ირაკლი კობახიძემ.
ტრადიციული საკალანდო თეატრალიზებული რიტუალი სოფელ ცხემლისხიდში, ქორეოგრაფ გიორგი სალუქვაძის სახლ-მუზეუმში გაიმართა.
ღონისძიებაში, რომელიც ოზურგეთის მუნიციპალიტეტის გამგეობის ორგანიზებით გაიმართა, ადგილობრივი და მოწვეული ანსამბლები: „შემოქმედი“,„იადონი“, „ელესა“,„ურეკი“ და „ზენაარი“ მონაწილეობდნენ.