საქართველოსთვის მნიშვნელოვანია, რომ ევროპულ დღის წესრიგში დარჩეს ოკუპაციის საკითხი და ის, რომ რუსეთის ფედერაციას დღემდე არ აქვს შესრულებული ის შეთანხმება, რომელიც თავის დროზე ევროკავშირის მედიატორობით არის მიღწეული, – ამის შესახებ საპარლამენტო უმრავლესობის წევრმა ირაკლი ჩიქოვანმა „ქრონიკაში“ ისაუბრა.
„წლებია უკვე უმაღლეს დონეზე არ ჩატარებულა სამიტი, სადაც სახელმწიფოსა და მთავრობის მეთაურები მიიღებდნენ მონაწილეობას და ამ ორგანიზაციის პერსპექტივაზე ისაუბრებდნენ. მოდი ვაღიაროთ, რომ არსებობს საკითხები ევროპულ დღის წესრიგში, რომელიც უფრო მეტ კონსოლიდირებულ მიდგომას მოითხოვს ყველა სახელმწიფოს მხრიდან. მათ შორის არსებობს საკითხები, რომელიც უკავშირდება ადამიანის უფლებათა ევროპული სასამართლოს გადაწყვეტილებების აღსრულებას, რაც ძალიან მნიშვნელოვანია და ეს არა მხოლოდ სახელმწიფოებს შორის დავებთან მიმართებაშია მნიშვნელოვანი, არამედ კონკრეტულ დავებთან, ინდივიდებთან მიმართებაშიც. აქ ხაზი მინდა გავუსვა, რომ საქართველოს ძალიან კარგი შედეგები აქვს ამ მიმართულებით. როგორც რაოდენობის თვალსაზრისით ძალიან დაკლებულია საქართველოსგან მომართვიანობა, ასევე აღსრულების თვალსაზრისითაც საქართველოს პრაქტიკულად ყველაფერი შესრულებული აქვს და აქედან გამომდინარე არის საკითხები, რომელზეც კიდევ ერთხელ სახელმწიფოების მეთაურებმა, თავიანთი ქვეყნის სახელით უნდა განაცხადონ, რომ უერთგულებენ იმ პრინციპებს, რაზეც დგას ევროპული სასამართლო. გარდა ამისა, უმნიშვნელოვანესია რუსეთის ფედერაციის პრობლემა, აქტუალურია ის თემა, რომ რუსეთი აგრესიულ ომს აწარმოებს უკრაინაში, მაგრამ ჩვენთვის, საქართველოსთვის მნიშვნელოვანია, რომ ევროპულ დღის წესრიგში დარჩეს ოკუპაციის საკითხი და ის, რომ რუსეთის ფედერაციას დღემდე არ აქვს შესრულებული ის შეთანხმება, რომელიც თავის დროზე ევროკავშირის მედიატორობით იყო მიღწეული“,- განაცხადა ჩიქოვანმა.