საფეხბურთო კლუბ “სიონს’’ ახალი დირექტორი ჰყავს. დღეიდან ბოლნისურ კლუბს ბუბა ტყავაძე უხელმძღვანელებს.
„ბოლნისის ,,სიონი“ უკვე ქალაქის ტრადიციაა და ჩვენ მუნიციპალიტეტის ხელმძღვანელობა მაქსიმალურად დავიხარჯებით იმისათვის, რომ გუნდმა ძველი დიდება დაიბრუნოს და პირველ რიგში გადავიდეს უმაღლეს ლიგაში. დღეს ბუბა ტყავაძე იმიტომ წარმოგიდგინეთ კლუბის დირექტორად, რომ ჩვენ გვჯერა მისი პროფესიონალიზმის, მისი შრომისმოყვარეობისა და თავდადების და ვიცით, რომ მისი მუშობა შედეგზე იქნება ორიენტირებული“,- ამ სიტყვებით წარუდგინა ბოლნისის მუნიციპალიტეტის გამგებელმა დავით შერაზადაშვილმა ახალი ხელმძღვანელი კლუბის თანამშრომლებს, ფეხბურთელებსა და გულშემატკივრებს.
დავით შერაზადიშვილმა ყურადღება ტყავაძის პროფესიონალიზმზე გაამახვილა და ბოლნისში არსებულ საფეხბურთო ტრადიციებზე ისაუბრა.
ბუბა ტყავაძე, რომელსაც მრავალწლიანი სპორტული გამოცდილება აქვს, უკვე გაეცნო კლუბში არსებულ მდგომარეობას და ინფრასტრუქტურას. ტყავაძე წლების წინ ,,სიონში’’ ასპარეზობდა, შემდეგ გარკვეული პერიოდი ბავშვთა ფეხბურთს ხელმძღვანელობდა, ხოლო ბოლო წლებში საფეხბურთო კლუბ თბილისის ,,დინამოს“ სპორტული და გენერალური დირექტორის თანამდებობა ეკავა. ის მშობლიურ გუნდს დაუბრუნდა და ახალი გეგმებითა და შემართებით შეუდგა მუშაობას, როგორც აცხადებს მისი ძირითადი მიზანი კლუბის უმაღლეს ლიგაში დაბრუნებაა. საფეხბურთო კლუბ ,,სიონს’’ საქართველოს ფეხბურთის ფედერაციის ლიცენზირების კომიტეტის გადაწყვეტილებით ეროვნული ლიცენზია მიენიჭა, რომლის თანახმადაც კლუბი აკმაყოფილებს პრო და ,,ა’’ლიცენზიის მოთხოვნას.