„ნაციონალური მოძრაობის“ დაშლასა და მიხეილ სააკაშვილის როლზე, დედაქალაქის ყოფილმა მერმა გიგი უგულავამ ტელეკომპანია „პირველის“ ეთერში ისაუბრა. უგულავას თქმით, მიხეილ სააკაშვილის მხრიდან არასწორი და არაადეკვატური იყო პარტიის ასე გაყოფა. მისი თქმით, ”ეს ბალაგანი კი დამამცირებელი და დამანგრეველი აღმოჩნდა პარტიისთვის”.
„მიშა სააკაშვილი არის ძლიერი პოლიტიკოსი, მაგრამ ჩემი გადმოსახედიდან იყო უფრო ძლიერი და მიმზიდველი პოლიტიკოსი. მე და ჩემი თანაპარტიელები ვცდილობდით, რომ ურთიერთობის ახალი ფორმები შეგვექმნა. მძაფრი პოლიტიკური ბრძოლის მომხრე მე ვარ სააკაშვილზე მეტად, სამწუხაროდ სააკაშვილი ამაზე უფრო მეტად ლაპარაკობს, ვიდრე რეალურად ახორციელებს. აქ მთავარი ის არის, რომ მან თავად ვერ გაარკვია რა უნდოდა, ვერ გადმოსცა იმ ხალხს, ვინც მას გვერდით ედგა და რომლებიც მისი გუნდის წევრები იყვნენ. ეს არის მთავარი პრობლემა და არა ის, რომ მას რევოლუცია უნდოდა.
მე ერთადერთი რაც ადამიანურად მეწყინა არის ის, რომ მიხეილ სააკაშვილს შეეძლო ეს დაშორება ცივილიზებულად, ადამინურად მოეხდინა, მე რომ ციხიდან გამოვედი (ბავშვი და სულელი არ ვარ), ვხედავდი, რომ ეს კოკა ვეღარ გამთელდებოდა. თხოვნა, როგორც სხვებთან ასევე მიხეილ სააკაშვილთან მქონდა, რომ ცივილიზებულად გაეკეთებინა დაშორება, ეს ბალაგანი არ იყო საჭირო. ეს იყო დამამცირებელი, დამანგრეველი. ლიდერი ასე არ იქცევა”, – განაცხადა უგულავამ.
უგულავამ ასევე აღნიშნა, რომ სააკაშვილის პერსონალური გადაწყვეტილება, რომ პოლიტიკური კარიერა ოდესაში დაიწყო არასწორი იყო. მისივე თქმით, სააკაშვილი მთელი თავისი პოლიტიკური მოღვაწეობის განმავლობაში, დღეს ყველაზე ღრმა კრიზისშია და თავადაც ვერ ხედავს გამოსავალს.
„ჩემი გადმოსახედიდან სააკაშვილი როგორც პოლიტიკოსი, დღეს ყველაზე ღრმა კრიზისშია, მის 20 წლიანი პოლიტიკურ კარიერას თვალი რომ გადავავლოთ. ისეთ კრიზისშია, საიდანაც სამწუხაროდ თვითონ ვერ ხედავს გამოსავალს. იგივე უკრაინის მოღვაწეობა რომ ავიღოთ, მე აქტიური მხარდამჭერი ვიყავი იმის რომ მასაც და ჩვენს სხვა მეგობრებს უკრაინაში საქმიანობა გვქონოდა, მაგრამ კატეგორიული წინააღმდეგი ვიყავი ოდესაში წასვლის. ყველაფერს თავი რომ დავანებოთ, ბუნებრივად ჩვენი მთელი უცხოელი პარტნიორებისთვის ის დამთავრდა როგორც ქართველი პოლიტიკოსი, ამას ნებისმიერი ელჩი, ნებისმიერი ევროპარლამენტარი, კონგრესმენი გვეტყვის, დიახ, სააკაშვილი არის პოლიტდევნილი, მაგრამ ქართველ პოლიტიკოსად აღარ მოიხსენიება. გუბერნატორი – სამი მეხანძრის უფროსია, მას სხვა არანაირი პოლიტიკური წონა არ აქვს. ეს იყო ლატენტური ტკივილი პრეზიდენტული ცხოვრების დაკარგვის. ეს არ იყო სწორი პოლიტიკური გადაწყვეტილება, ეს არასწორი პერსონალური გადაწყვეტილება იყო, რამაც ჩემი აზრით, იქაც ეროზია გამოიწვია“, – განაცხადა გიგი უგულავამ.