ყველა ადამიანს აქვს იმის შესაძლებლობა, რომ გამოხატოს თავისი დამოკიდებულება, ლაზარე გრიგორიადისს რაც შეეხება, მას ბრალად ედება „მოლოტოვის კოქტეილის“ სროლა და როდესაც შენი ქმედება სცდება კანონს, ამას შესაბამისი უწყებების მხრიდან ყოველთვის მოჰყვება რეაგირება, – ამის შესახებ თბილისის მერმა, კახა კალაძემ განაცხადა.
კალაძის თქმით, დღეს ქვეყანაში გამოხატვის თავისუფლება დაცულია, თუ ეს ყველაფერი კანონის ფარგლებში ჯდება.
„ნებისმიერ ადამიანს ამ ქვეყანაში აქვს სიტყვისა და გამოხატვის თავისუფლება, არავინ შეზღუდული არ არის. წარსულს ჩავაბარეთ წლები, როდესაც ამ მიმართულებით იყო უდიდესი პრობლემა. გახსოვთ ხომ, რა ხდებოდა, არ გასულა ბევრი დრო, რომ ადამიანებს დავიწყებოდათ ეს ყველაფერი. ცოლი ქმარს ვერ ელაპარაკებოდა შიშით, რომ ვინმეს რაიმე არ ჩაეწერა, მეგობარი მეგობარს ვერ ესაუბრებოდა, თუ ვინმეს განსხვავებული შეხედულება გვქონდა, ვიდევნებოდით, თუ სხვა პოლიტიკური შეხედულება გქონდა, იდევნებოდი, სამსახურიდან გაგდებდნენ და ა.შ. დაკავებები, დაჭერები და ა.შ. დღეს სიტყვისა და გამოხატვის თავისუფლება არის ქვეყანაში დაცული, ნებისმიერ ადამიანს ეს შეუძლია, მანიფესტაციაზე გასვლით დააფიქსიროს, მაგრამ ყველაფერი უნდა იყოს კანონის ფარგლებში, თუ არღვევ კანონს, ამას ყოველთვის მოჰყვება რეაგირება“, – განაცხადა კალაძემ.