საქართველო განვითარების კუთხით იმაზე უფრო წინ არის, ვიდრე უკრაინა იყო ომის დაწყებამდე. ბევრი გამოწვევა აქვთ, მაგრამ მიმდინარეობს მუშაობა მათ აღმოსაფხვრელად, – ამის შესახებ დანიის საგარეო საქმეთა მინისტრმა ლარს ლოკე რასმუსენმა საქართველოში ვიზიტის შემდეგ, კოპენჰაგენის უნივერსიტეტში სტუდენტების წინაშე გამოსვლისას განაცხადა.
მისი თქმით, ევროკავშირმა მხარი უნდა დაუჭიროს საქართველოს, ისევე, როგორც უკრაინისა და მოლდოვას ევროპულ არჩევანს და ევროინტეგრაციის მიმართულებით მათ მიერ გადადგმულ ნაბიჯებს.
„თუ ჩვენ თუ არ დავეხმარებით ამ ქვეყნებს თავიანთი მიზნის მიღწევაში, სხვები ჩაერევიან – შიდა ან გარე ძალები, რომლებიც რუსეთის გავლენებთან უფრო ახლოს არიან“, – დასძინა ლარს ლოკე რასმუსენმა.
მისი თქმით, ასოცირებული ტრიოს სამივე ქვეყნის პროგრესი და ევროკავშირთან დაახლოება თავად ევროკავშირის ინტერესშია.
„ევროკავშირში გაწევრიანება დროში გაწერილი პროცესია, რომელსაც შეიძლება 5, 10 ან თუნდაც 15 წელი დასჭირდეს, მაგრამ ეს ქვეყნები ახლოს უნდა გვყავდეს”, – ხაზგასმით აღნიშნა დანიის საგარეო საქმეთა მინისტრმა.
აღსანიშნავია, რომ, 16 მაისს, გამოქვეყნდა დანიის საგარეო და უსაფრთხოების პოლიტიკის ახალი სტრატეგია, რომელიც ლარს ლოკე რასმუსენმა კოპენჰაგენის უნივერსიტეტში გამოსვლისას წარადგინა. ამ დოკუმენტში საქართველო რამდენჯერმეა ნახსენები და სწორედ ევროკავშირში გაწევრიანების კონტექსტში.
„ევროპის ერთ-ერთი მთავარი ამოცანა, გააძლიეროს ურთიერთობები აღმოსავლეთ სამეზობლოს ქვეყნებთან და მხარი დაუჭიროს ევროკავშირში გაწევრიანებისკენ მათ სწრაფვას, იმ ფონზე, რომ რუსეთი, საკუთარი გავლენის შენარჩუნების მიზნით, რეგულარულად ცდილობს დასავლეთ ბალკანეთში, საქართველოსა და მოლდოვაში დესტაბილიზაციას“, – ნათქვამია დანიის საგარეო და უსაფრთხოების პოლიტიკის ახალ სტრატეგიაში.
სტრატეგიული დოკუმენტის თანახმად, საჭიროა ამ ქვეყნების პოლიტიკური და ეკონომიკური მოდერნიზაცია, რაც, მთლიანობაში, ხელს შეუწყობს მათ ევროპულ საზოგადოებად ჩამოყალიბებას, კოპენჰაგენის კრიტერიუმების შესრულებასა და ევროკავშირში გაწევრიანების საბოლოო მიზნის მიღწევას.
აღსანიშნავია, რომ 14 მაისს, საქართველოს დანიის სამეფოს საგარეო საქმეთა მინისტრი ლარს ლოკე რასმუსენი ეწვია. მისი ვიზიტი შეფასდა, როგორც საქართველოს ევროპული მისწრაფებებისა და საგარეო პოლიტიკური პრიორიტეტების მტკიცე მხარდაჭერა.
„ევროკავშირის კანდიდატის სტატუსთან დაკავშირებით ჩემი ქვეყნის პასუხი იქნება – დიახ“, – აღნიშნა დანიის საგარეო საქმეთა მინისტრმა საქართველოში ვიზიტისას.
„არ ვამბობ, რომ საქართველო ხვალ გახდება ევროკავშირის წევრი, მიუხედავად იმისა, რომ ამ ქვეყანამ რეფორმების გატარებისა და გადაწყვეტილებების კუთხით ბევრი რამ გააკეთა. ისიც უნდა აღინიშნოს, რომ სინამდვილეში, საქართველო ბევრად უფრო წინ იყო, ვიდრე უკრაინა, როდესაც ომი დაიწყო, იგულისხმება ქვეყანაში არსებული შიდა პროცესები, რეფორმები, სახელმწიფო ინსტიტუციები, ანტი-კორუფციული გარემო და სხვა…. ყველაფრის შესრულებას შესაძლოა 5, 10, 15 წელიც კი დასჭირდეს, წინასწარ ვერ განვსაზღვრავთ, ვინაიდან ჩვენი (ევროპის) პოზიციაა, რომ ეს არის დამსახურებაზე დაფუძნებული (marit-based) მიდგომა, რომ არსებობს გარკვეული სტანდარტები, „კოპენჰაგენის კრიტერიუმები“, რომელთა შესრულებაა საჭირო, მათ მისაღწევად კი არსებობს მოკლე და გრძელი გზები – შეიძლება იყო ძალიან ან ნაკლებად დაოსტატებული მსგავსი ნახტომების შესრულებაში. ამდენად, ცალსახად უნდა ითქვას, რომ ამ გზაზე დახმარების გაწევა ჩვენსავე ინტერესებში შედის და მხოლოდ ერთობლივად შევძლებთ წარმატების მიღწევას“, – აცხადებს დანიის საგარეო საქმეთა მინისტრი.