მარიამ ჯაში ევროკავშირის ელჩს შეხვდა

განათლების, მეცნიერებისა და კულტურის კომიტეტის თავმჯდომარე მარიამ ჯაში, ევროკავშირის ელჩს საქართველოში, იანოშ ჰერმანს შეხვდა.
იანოშ ჰერმანმა მარიამ ჯაშს კომიტეტის ხელმძღვანელად არჩევა მიულოცა და საპარლამენტო საქმიანობაში წარმატება უსურვა.
შეხვედრაზე ელჩმა განათლების, მეცნიერებისა და კულტურის სფეროს ის ძირითადი პროგრამები მიმოიხილა, რომელიც უკვე ხორციელდება საქართველოში, მათ შორის, „ჰორიზონ 2020“-ის პროგრამა, რომელიც სამეცნიერო პოტენციალის განვითარებისთვის არის მნიშვნელოვანი.
„ყურადღება გამახვილდა იმ საკითხზე, რომ ევროკავშირი მიმდინარე ეტაპზე მუშაობს ახალი სტრატეგიული ჩარჩოს შემუშავებაზე, რომელიც განსაზღვრავს პრიორიტეტულ მიმართულებებს 2020 წლამდე საქართველოს მთავრობასთან თანამშრომლობის თვალსაზრისით.
შესაძლებელია, რომ ერთ-ერთი პრიორიტეტული მიმართულება, პრემიერ-მინისტრის 4-პუნქტიანი გეგმის და სამთავრობო პროგრამის გათვალისწინებით, მოიცავდეს პროფესიული განათლების პროგრამების ხელშეწყობას, რათა პროფესიული განათლება შეესაბამებოდეს თანამედროვე შრომის ბაზრის მოთხოვნებს“, – განაცხადა მარიამ ჯაშმა.
მისივე ინფორმაციით, შეხვედრაზე აქცენტი გაკეთდა განათლების ხელშეწყობაზე, როგორც ეკონომიკის განვითარების უმნიშვნელოვანეს დარგზე.
მხარეები შეთანხმდნენ, რომ სამომავლოდ კომიტეტის თავმჯდომარე ელჩს უფრო დეტალურად გააცნობს კომიტეტის საქმიანობას როგორც ზოგადი, უმაღლესი და პროფესიული განათლების კუთხით, ასევე კულტურის რეგიონალური პროგრამების მიმართულებით.