აშშ-ის სახელმწიფო მდივანმა, ენტონი ბლინკენმა გააკრიტიკა რუსეთის საგარეო საქმეთა მინისტრის, სერგეი ლავროვის პოზიცია და აღნიშნა, რომ მინისტრი ურყევი დარჩა უკრაინაში მისი ქვეყნის სრულმასშტაბური შეჭრის მიმართ. ინფორმაციას ამის შესახებ ტელეკომპანია CNN-ი ავრცელებს.
სამხრეთ-აღმოსავლეთ აზიის ქვეყნების ასოციაციის მინისტრთა შეხვედრის ფარგლებში ჯაკარტაში გამართულ პრესკონფერენციაზე ბლინკენმა აღნიშნა, რომ არაფერი სმენია ლავროვისგან, „რაც მიმართულების ცვლილებას ვარაუდობს, როდესაც საქმე ეხება იმას, რასაც რუსეთი აკეთებს უკრაინაში“.
„ჩემი აზრით, ეჭვგარეშეა, რომ გლობალური აზრის აბსოლუტური უმრავლესობა, მათ შორის სამხრეთ-აღმოსავლეთ აზიაში, მტკიცედ უჭერს მხარს პრინციპებს, რომელიც ყოველდღიურად ირღვევა რუსეთის მიერ უკრაინის წინააღმდეგ აგრესიის დროს“, – აღნიშნა აშშ-ის სახელმწიფო მდივანმა.
„შეერთებული შტატებისა და მრავალი სხვა ქვეყნისგან განსხვავებით, ის [სერგეი ლავროვი] მხოლოდ ნეგატიურ კონტექსტსა და დღის წესრიგზე ამახვილებს ყურადღებას და ფაქტობრივად, აშშ-ს მიაწერს მსოფლიოს ყველა პრობლემას“, – დასძინა მან.