საქართველოს ელჩი უკრაინაში მიხეილ უკლება გია ცერცვაძის საქმესთან დაკავშირებით ხვალ უკრაინის სახალხო დამცველს შეხვდება.
შეხვედრაში მონაწილეობას გია ცერცვაძის მეუღლე და ადვოკატი მიიღებენ, რომლებიც დღეს, კიევის სააპელაციო სასამართლოში გამართული პროცესის შემდეგ მიხეილ უკლებას შეხვდნენ.
როგორც უკლებამ „ინტერპრესნიუსს“ განუცხადა, სამწუხაროა, რომ გია ცერცვაძის გათავისუფლება დღეს არ მოხდა, თუმცა ქართული მხარე ამ მიზნით მუშაობას განაგრძობს.
„ქალბატონ ტატიანას გავაცანით ყველა ის ნაბიჯი და ქმედება, რომელიც საქართველოს საელჩომ უკრაინაში და საგარეო საქმეთა სამინისტრომ გადადგა, მათ შორის, ჩვენ მიერ გაგზავნილი ნოტები და პასუხები. ჩვენ ჩართული ვართ საქმეში 15 იანვრიდან, როდესაც ცერცვაძე დააკავეს ჟულიანის აეროპორტში. შეხვედრას ესწრებოდა ცერცვაძის ადვოკატიც, რომელთანაც მუდმივი კონტაქტი გვაქვს. შევთანხმდით, რომ ხვალ შევხვდებით ომბუდსმენს. ასე ნაბიჯ-ნაბიჯ, პროფესიონალურად თუ ვიმუშავებთ, მე მგონი, შედეგს მივიღებთ. ყველა ნაბიჯი უნდა გადადგას საელჩომაც, საგარეო საქმეთა სამინისტრომაც, ჩვენმა მთავრობამ და საზოგადოებამაც, რომ დროულად გათავისუფლდეს ჩვენი მოქალაქე“, – განაცხადა მიხეილ უკლებამ.