ოლიმპიური კომიტეტი მუშაობას ჩვეულ რეჟიმში განაგრძობს, არაფერი შეცვლილა, – ამის შესახებ ჟურნალისტებს, ოლიმპიური კომიტეტის პრეზიდენტმა ლერი ხაბელოვმა განუცხადა.
ხაბელოვის თქმით, ირაკლი მეძმარიაშვილის ბრალდებები იმასთან დაკავშირებით, რომ კომიტეტის პრეზიდენტობის არჩევნების დროს ხმის უფლების მქონე სუბიექტებს ჰქონდათ პრობლემები როგორც იურიდიული, ასევე რეგისტრაციის კუთხით, სიმართლეს არ შეესაბამება. მისივე განცხადებით, არსებობს ოფიციალური დოკუმენტები, რომელიც ადასტურებს, რომ არჩევნები ყოველგვარი დარღვევების გარეშე ჩატარდა და მის ლეგიტიმურობასთან დაკავშირებით არსებული კითხვები უსაფუძვლოა.
”ოლიმპიური კომიტეტი მუშაობას ჩვეულ რეჟიმში განაგრძობს, არაფერი შეცვლილა. გასაგებია ირაკლი მეძმარიაშვილის სარჩელი. ეს ადამიანი აგებს. მე, როგორც სპორტსმენი, მოგებაც ვიცი რა არის და წაგებაც. ბევრი ადამიანი კი ვერ ეგუება ამას და ბატონ ირაკლის ეს დაემართა. ის ეკიდება ისეთ საკითხებს, რომელიც ფაქტობრივად ბუნებაში არ არსებობს. ამ განჩინებაში პირდაპირ წერია, რომ წესდების თანახმად, საქართველოს ოლიმპიური კომიტეტის, იმერეთის რეგიონული კომიტეტის, ქვემო ქართლის რეგიონული ორგანიზაცია, აფხაზეთის ორგანიზაცია, საქართველოს ოლიმპიელთა კლუბი და ეროვნული ოლიმპიური კომიტეტის სპორტსმენთა კომისია იურიდიული პირების რეესტრში რეგისტრირებულნი არ არიან. თუმცა მე შემიძლია წარმოგიდგინოთ დოკუმენტები, რომ ეს ორგანიზაციები ნამდვილად არიან რეგისტრირებულნი. ეტყობა საჯარო რეესტრიდან დოკუმენტი სწორად ვერ ამოიღეს. ვაპირებ ხუთი დღის ვადაში მივმართო სასამართლოს და წარვუდგინო ჩემს ხელთ არსებული დოკუმენტები, საიდანაც ირკვევა, რომ არჩევნები კანონის სრული დაცვითა და გამჭვირვალედ ჩატარდა”, – განაცხადა ლერი ხაბელოვმა.