საპარლამენტო უმრავლესობა “ნაციონალური მოძრაობის” მოთხოვნას სუს-ის უფროსის, ვახტანგ გომელაურის გადადგომის შესახებ, არაადეკვატურს უწოდებს. “ქართული ოცნების” წარმომადგენელი ლევან გოგიჩაშვილი ფიქრობს, რომ დამოუკიდებელი სასამართლოს საქმიანობაში პირიქით, მიხეილ სააკაშვილი ერევა, რის დასტურადაც მოჰყავს ორი დღის წინ უკრაინული ვებ-გვერდის მიერ გავრცელებული მიმოწერა, სადაც სავარაუდოდ მიხეილ სააკაშვილი და დავით საყვარელიძე “რუსთავი2”-ის საქმის მოსამართლეების შესახებ საუბრობენ.
“გომელაურის გადადგომის მოთხოვნა სრულიად არაადეკვატურია. ქურდს კუდი ეწვისო – ისეა “ნაციონალური მოძრაობის” საქმე. ჩვენ ყველამ ვნახეთ ის მიმოწერა, რომელიც უკრაინულმა მედიამ გაავრცელა და ასახავს როგორ ცდილობს სააკაშვილი კვლავ აფათუროს ხელი სასამართლოს დამოუკიდებლობაში ამ კონკრეტული მოსამართლეებისთვის რაღაც ამანათების გაგზავნის სახით. ძალიან სერიოზული გამოძიების ჩატარება მოუწევს პროკურატურას, რათა საზოგადოებამ რეალურად გაიგოს ვინ ცდილობს ამ ქვეყანაში დამოუკიდებელ სასამართლოზე ზეწოლას და ბინძური მეთოდებით ქვეყნის სტაბილურობისთვის საფრთხის შექმნას. ვფიქრობ, ისეთ საქმეზე, როგორიც არის “რუსთავი2″-ის საქმე, გადაწყვეტილება უნდა მიიღონ ისეთმა მოსამართლეებმა, რომელთა მიმართაც არანაირი კითხვის ნიშნები არ იარსებებს”, – აცხადებს “პრაიმტაიმთან” საუბრისას დეპუტატი ლევან გოგიჩაიშვილი.
შეგახსენებთ, რომ უზენაესი სასამართლოს მოსამართლეებმა, ბესარიონ ალავიძემ და პაატა ქათამაძემ, რომლებიც ”რუსთავი 2”-ის საქმეს განიხილავენ, მათ საქმიანობაში უხეშად ჩარევის შესაძლო ფაქტზე გამოძიების დაწყების მოთხოვნით პროკურატურას მიმართეს. როგორც პროკურატურაში აცხადებენ, აღნიშნულ ფაქტზე გამოძიება 14 იანვარს დაიწყო. თავის მხრივ, „ნაციონალურ მოძრაობაში” დღეს გაკეთდა განცხადება, რომ აღნიშნულ მოსამართლეებზე ზეწოლას სუს-ი ახორციელებდა, რის გამოც პარტიამ სახელმწიფო უსაფრთხოების სამსახურის უფროსის ვახტანგ გომელაურის გადადგომის მოთხოვნა დააყენა.