საგარეო საქმეთა სამინისტრო თურქეთში საქართველოს 5 მოქალაქის დაკავების ფაქტს ადასტურებს

საგარეო საქმეთა სამინისტროში თურქეთში საქართველოს 5 მოქალაქის დაკავების ფაქტს ადასტურებენ. როგორც „კვირას“ უწყების პრესსამსახურში განუცხადეს, საკონსულოში საქართველოს მოქალაქეების დაკავების შესახებ ოფიციალური ინფორმაცია ადგილობრივმა პოლიციამ მიაწოდა.
„საქართველოს მოქალაქეების დაკავების შესახებ ოფიციალური შეტყობინება საკონსულოში შესულია. საკონსულო მუდმივ კონტაქტზეა ადგილობრივ პოლიციასთან“, – აცხადებენ სამინისტროში.
შეგახსენებთ, რომ თურქეთის რიზეს პროვინციაში, არდაშენის რაიონში, ხუთი ქართველი დააკავეს, რომლებიც 150 წლის წინათ ოსმალეთის იმპერიაში დაწერილი ძველი ყურანის გაყიდვას ცდილობდნენ . ამის შესახებ გამოცემა “sozcu.com” იუწყება. ოპერაცია თურქეთის ჟანდარმერიამ ჩაატარა. დაკავებულთა ბინის ჩხრეკისას, ამოღებულია 6 ცალი ძველი ყურანი, ცეცხლსასროლი იარაღი, 5 დანა და12 აბი ნარკოტიკული ნივთიერება, ასევე, კანაფის თესლი. გამოცემა დაკავებულთა ვინაობასაც აქვეყნებს. ესენი არიან გიორგი ჩაკვეტაძე, თორნიკე და კობა ლიპარტელიანები, სულხან მუკბანიანი და ირაკლი გორდაძე.