“დავით საყვარელიძე ბედავდა უტიფრად და ფალსიფიკაციაზე გველაპარაკებოდა“, – ასე გამოეხმაურა საქართველოს მთავარი პროკურორის ყოფილი პირველი მოადგილე ლაშა ნაცვლიშვილი დავით საყვარელიძის კომენტარს მთავარი პროკურატურის მიერ დღეს გამოქვეყნებულ მასალებთან დაკავშირებით. ტელეკომპანია „ტვ პირველის“ ეთერში ნაცვლიშვილმა საყვარელიძის ბიოგრაფია გაიხსენა და განაცხადა, რომ სწორედ დავით საყვარელიძის პროკურორობის დროს ხდებოდა გახმაურებული საქმეების ფალსიფიცირება და სწორედ მისი ბიოგრაფია მეტყველებს, თუ რისი გამკეთებელია ის. ნაცვლიშვილის თქმით, მას გული სწყდება, რომ დავით საყვარელიძე მისი პროკურატურაში მუშაობის დროს მატროსოვის ციხეში არ ჩასვა.
„ისეთი რიხით საუბრობდა ფალსიფიკაციაზე ბატონი დავით საყვარელიძე, რაზეც მისი ბიოგრაფიაც მეტყველებს. ბედავდა და უტიფრად ფალსიფიკაციაზე გვესაუბრებოდა. მისი პროკურორობის პერიოდში ააფეთქეს და ამოწყვიტეს თანამოქალაქეები ხურჩაში, ამ პროკურორის პირობებში გადაწვეს ქიბარ ხალვაშის საკუთრება. ეს არის პროკურორი, რომლის დროსაც გირგვლიანის მკვლელობის სრული ფალსიფიკაცია მოახდინა მთელმა სახელმწიფო აპარატმა. სტრასბურგის ადამიანის უფლებათა დაცვის სასამართლომ მიუთითა, რომ პროკურატურამ, შსს-მ, სასჯელაღსრულების დეპარტამენტმა, პრეზიდენტმა და სასამართლომ ერთობლივად მოახდინეს ფალსიფიკაცია, რათა მართლმსაჯულება არ აღსრულებულიყო. ეს არის ადამიანი, რომლის სეიფშიც, ქალაქის პროკურორობის პირობებში, 4 წლის განმავლობაში, მტვერი ედებოდა ბუტა რობაქიძის საქმეს. პირდაპირ ვამბობ, თუ რამეზე მწყდება გული ჩემი 10-თვიანი პროკურორობის პერიოდში, აი ეს, უკრაინიდან რომ გველაპარაკება და მატროსოვზე არ ზის, ამაზე მწყდება გული. მას წერილის გამოგზავნა კი არ დააბრალეს, ია მეტრეველს შვილი მოუკლეს და მერე კრიმინალად გამოაცხადეს. ამას აყალბებდა პირადად საყვარელიძე. როგორ ბედავენ ეს ნაძირლები ფალსიფიკაციაზე ლაპარაკს. დავით საყვარელიძის ბიოგრაფია მეტყველებს, ვინ რას იზამდა“, – განაცხადა ლაშა ნაცვლიშვილმა.
პროკურატურის ინფორმაციით, უზენაესი სასამართლოს მოსამართლეებმა – ბესარიონ ალავიძემ და პაატა ქათამაძემ წერილობითი შეტყობინებები დ. საყვარელიძის სახელით მიიღეს, თუმცა უწყება ამ ეტაპზე არ აკონკრეტებს, არის თუ არა ის მთავარი პროკურორის ყოფილი მოადგილე დავით საყვარელიძე. ამასთან, პროკურატურის ცნობით, მოსამართლეებმა უკრაინაში რეგისტრირებული ტელეფონის ნომრებიდან მიიღეს სმს შეტყობინებებიც, თუმცა ვის სახელზეა ისინი რეგისტრირებული, ამაზე საგამოძიებო უწყებაში ჯერჯერობით არ საუბრობენ.
ნაცვლიშვილმა დავით საყვარელიძეს და წინა ხელისუფლების სხვა მაღალჩინოსნებს ფალსიფიცირების დამფუძნებლები და ეტალონები უწოდა.