ბოდბელ მთავარეპისკოპოსს, მეუფე იაკობ იაკობიშვილს არ აქვს ინფორმაცია იმის შესახებ, რომ სასულიერო პირების მხრიდან ევროკავშირის დროშის დაწვასთან დაკავშირებით, შესაძლოა, სინოდის სხდომა შეიკრიბოს.
როგორც მეუფემ აღნიშნულ თემაზე ჟურნალისტის კითხვაზე საპასუხოდ განაცხადა, ამ საკითხით არ დაინტერესებულა.
„ნამდვილად არ მაქვს ინფორმაცია. ერთმა ჟურნალისტმა დამირეკა და მისგან გავიგე, რომ ერთ-ერთ სასულიერო პირს შეუჩერეს მოღვაწეობის უფლება. არ ვარ საქმის კურსში, არ ვინტერესდები. ევროპის ბევრ ქვეყანაში ვყოფილვარ და მინახავს, როგორ წვავენ დროშებს. განა ვიწონებ ან არ ვიწონებ საქციელს, ყველგან მინახავს და პოლიცია არც ჩარეულა. ერთი რამე ვიცი, ადამიანს როცა წვავდნენ, პოლიტიკოსებს ძალიან არასწორი და უაზრო აზრები აწუხებდათ, ამის მერე დროშაზე აღარც წამიკითხავს და არც მაინტერესებს“, – განაცხადა მეუფე იაკობმა.
ტელეკომპანია „ფორმულას“ ჟურნალისტის კითხვაზე, გულისხმობს თუ არა მეუფე ლაზარე გრიგორიადისს, ბოდბელი მთავარეპისკოპოსი პასუხობს:
„აი, გმირად შერაცხეს, არ გახსოვთ, პოლიციელს რომ წვავდა? სახელი არ ვიცი, შეიძლება, ლაზარეც იყოს. მამა რომ ჰყავდა დაჭრილი. დროშა რატომ გაწუხებთ, როცა შესაწუხებელი ადამიანია? ადამიანი უნდა გაწუხებდეთ, ადამიანს უნდა გააგებინოთ, რომ სინანული გაუჩნდეს და რასაც აკეთებს, ცუდი საქციელია. სისტემა იყო „ნაცების“ დროს, მე ვარ შემსწრე, როგორი სისტემა. მე ვიცი, რომ ადამიანს წვავდნენ და არასწორად აშუქებდით ტელევიზიები. რა მნიშვნელობა აქვს, ლაზარე იყო თუ სხვა? წვავდნენ ადამიანს და არა მგონია, დროშა გაწუხებდეთ, არ დავიჯერებ მაგას. მამა არ დაჭრა მაგან? მოსაკლავად გაიმეტა საკუთარი მამა, უცხოსთან რამე რომ ჩაედინა, გასაკვირია? კიდევ ამართლებთ“, – განაცხადა მეუფე იაკობმა.
ამასთან, ჟურნალისტის კითხვაზე პასუხად მეუფემ აღნიშნა, რომ პრეზიდენტს აქვს დისკრეცია, შეიწყალოს არა მარტო ლაზარე, არამედ საქართველოს ყოფილი პრეზიდენტი, მიხეილ სააკაშვილიც.
„პრეზიდენტი აქვს თავის დისკრეცია, რომ შეიწყალოს, ის კი არა, სააკაშვილი რომ შეიწყალოს, მაგის უფლებაც აქვს. თქვენ მიესალმებით სააკაშვილის შეწყალებას? თუ ასე ტირილი გააგრძელა, არჩეული პრეზიდენტი იყო, ვაჟკაცებისკენ უფრო ვდგავართ, სუსტები რომ არიან, გაუგებარია“, – განაცხადა მეუფე იაკობმა.