“ყველა მხარეს ვუმეორებ მოწოდებას ყველა ფრონტზე ცეცხლის შეწყვეტის, ლიბანსა და ღაზაში მყოფი მძევლების დაუყოვნებლივ გათავისუფლების შესახებ”

რომის პაპი ფრანცისკე ისრაელსა და „ჰამასს“ შორის მიმდინარე კონფლიქტს ეხმაურება. პაპი კონფლიქტში მონაწილე მხარეებს ცეცხლის შეწყვეტისკენ მოუწოდებს.

„ყველა მონაწილე მხარეს ვუმეორებ ჩემს მოწოდებას ყველა ფრონტზე ცეცხლის შეწყვეტის შესახებ, მათ შორის ლიბანსა და ღაზაში მყოფი მძევლების დაუყოვნებლივ გათავისუფლების შესახებ. მე ვითხოვ, რომ პალესტინელმა ხალხმა მიიღოს ჰუმანიტარული დახმარება, ხოლო საავადმყოფოებმა და სკოლებმა – ყველა საჭიროება“, – აცხადებს რომის პაპი.

სიტყვით გამოსვლისას პაპმა ფრანცისკემ კიდევ ერთხელ დაგმო 7 ოქტომბერს „ჰამასის“ მიერ ისრაელზე განხორციელებული თავდასხმა, თუმცა აღნიშნა, რომ ისრაელის მიერ ღაზის სექტორზე განხორციელებულმა საპასუხო თავდასხმამ ათიათასობით პალესტინელის სიკვდილი და მძიმე ჰუმანიტარული კრიზისი გამოიწვია.

პაპმა ასევე აღნიშნა, რომ საჭიროა საერთაშორისოდ გარანტირებული სპეციალური სტატუსი იერუსალიმისთვის, რათა ისრაელელმა და პალესტინელმა ხალხმა საბოლოოდ შეძლონ მშვიდობიანად და უსაფრთხოდ ცხოვრება.