Biletebi.ge კონკურენციის და მომხმარებლის დაცვის სააგენტოს გადაწყვეტილების საპასუხოდ განცხადებას ავრცელებს.
როგორც კომპანიის განცადებაშია აღნიშნული, არ ეთანხმებიან Biletebi.ge-ს დაჯარიმებას, კინოსა და TKT-ს შორის გაფორმებული ხელშეკრულების ბაზრის შემზღუდველ შეთანხმებად მიჩნევას კი ეთანხმებიან.
„ვეთანხმებით სააგენტოს გადაწყვეტილებას იმ ნაწილში, რომ სააგენტომ მიიჩნია კინოსა და TKT-ს შორის გაფორმებული ხელშეკრულება ბაზრის შემზღუდველ შეთანხმებად. გადაწყვეტილების შედეგად შესაძლებლობა მიეცა Biletebi.ge-ს, დაბრუნებულიყო ბაზარზე.
არ ვეთანხმებით სააგენტოს გადაწყვეტილებას იმ ნაწილში, რომ Biletebi.ge დაჯარიმდა. Biletebi.ge-ს არასდროს ჰქონია ბაზრის შეზღუდვის მიზანი და მას არასოდეს დაუდია ასეთი შეთანხმება. Biletebi.ge მონაწილეობდა მოლაპარაკებაში, რომ მასაც ჰქონოდა ბილეთების ელექტრონული ვაჭრობის გაყიდვის შესაძლებლობა, მაგრამ შეთანხმება/ხელშეკრულება არასდროს გაფორმებულა. შესაბამისად, სააგენტოს გადაწყვეტილება ამ ნაწილში სამართლიანი არ არის Biletebi.ge-სთვის“, – აღნიშნულია Biletebi.ge-ს განცხადებაში.
კონკურენციის და მომხმარებლის დაცვის სააგენტომ კინოთეატრების ბილეთების ონლაინ რეალიზაციის ბაზარზე დარღვევის ფაქტი დაადგინა. სააგენტოს გადაწყვეტილებით, როგორც მომჩივან, ასევე მოპასუხე მხარეებს, სამ კომპანიას, ჯამურად, 1,6 მილიონ ლარზე მეტი ოდენობით სანქცია დაეკისრათ.