ნატოს გენერალური მდივნის მოადგილემ, მირჩა ჯოანამ განაცხადა, რომ რუსეთსა და უკრაინას შორის ომი კიდევ დიდხანს გაგრძელდება და სავარაუდოდ, 2025 წელსაც არ დასრულდება. ინფორმაციას ამის შესახებ უკრაინული მედია ავრცელებს.
მირჩა ჯოანამ აღნიშნა, რომ “შესაძლოა, გასულ გაზაფხულზე უკრაინის შეტევის დაწყებისას ზედმეტად აღსავსე ვიყავით ენთუზიაზმითა და ოპტიმიზმით” და აღნიშნა, რომ საჭიროა “გაჭიანურებული ომისთვის მომზადება”.
“ჩემი მოწოდებაა, ხანგრძლივი ომისთვის მომზადება, ის გაგრძელდება. ეს არ დასრულდება 2024 წელს, შესაძლოა არც 2025 წელს. ვერ ვხედავთ სამხედრო შესაძლებლობას გადამწყვეტი გამარჯვების ამა თუ იმ გზით მისაღწევად. ჩვენ ველით გაჭიანურებულ ომს მცირე შეტევებით, კონტრშეტევებით, ტერიტორიების დაპყრობითა და დაკარგვით. უკრაინელებმა ჩვენი მხარდაჭერით მოახერხეს რუსების მიერ თავდაპირველად ოკუპირებული ტერიტორიის 50%-ის დაბრუნება. ეს არ არის ცოტა”, – აღნიშნა ნატოს გენერალური მდივნის მოადგილემ.
“მოგიწოდებთ, არ გადახვიდეთ გაზვიადებული პესიმიზმის მეორე მხარეს, რადგან უკრაინას აქვს საკმარისი რესურსი ამ ომის გასაგრძელებლად და წარმატების მისაღწევად”, – დასძინა მან.