გერმანული გამოცემა „ბილდი“ წერს, რომ გერმანიის შეიარაღებული ძალები 2024 წლის თებერვალში რუსეთის მხრიდან ნატო-ს აღმოსავლეთ ფლანგზე ჰიბრიდული თავდასხმისთვის ემზადება.
ამის შესახებ „ბილდი“ ბუნდესვერის საიდუმლო დოკუმენტებზე დაყრდნობით წერს.
დოკუმენტში გერმანიის თავდაცვის სამინისტრო დეტალურად აღწერს, თუ როგორ შეიძლება, დაიწყოს კონფლიქტი ნატო-სა და რუსეთს შორის. ბუნდესვერის სავარაუდო სცენარის მიხედვით, რუსეთი უახლოეს ხანში მობილიზაციის ახალ ტალღას გამოაცხადეს, რის შემდეგაც გაზაფხულზე კრემლი უკრაინაში ახალ შეტევას დაიწყებს, რასაც მოჰყვება უკრაინის არმიის უკან დახევა.
ამავე დოკუმენტის მიხედვით, რუსეთის ფარული და შემდეგ უკვე ღია თავდასხმა დასავლეთზე ივლისში დაიწყება. „ბილდი“ წერს, რომ რუსეთის მხრიდან მოსალოდნელია კიბერთავდასხმები და ჰიბრიდული ომის სხვა ფორმების გამოყენება, შემდეგ კი, ამ სცენარის მიხედვით, ხდება შეტაკებები, რომელთაც რუსეთი გამოიყენებს საბაბად მასშტაბური წვრთნების დასაწყებად რუსეთსა და ბელარუსში.
სცენარის მიხედვით, სიტუაციის ესკალაცია შესაძლოა, მოხდეს ოქტომბერში, თუ რუსეთი კალინინგრადში ჯარს და საშუალო მანძილზე მფრენ რაკეტებს განალაგებს. ბუნდესვერში ვარაუდობენ, რომ სუვალის დერეფანში მოხდება ხელოვნურად გამოწვეული კონფლიქტი და არეულობა მრავალრიცხოვანი მსხვერპლით.
ამავე დოკუმენტში აღნიშნულია, რომ იმ მომენტში, როდესაც აშშ-ში ჩატარებული არჩევნების შემდეგ აშშ დროებით ლიდერის გარეშე დარჩება, რუსეთი ნატო-ს ტერიტორიაზე გაიმეორებს ისეთივე შეჭრას, როგორც ეს 2014 წელს ყირიმში გააკეთა. ამავე სცენარით, მაისში ნატო რუსეთის შესაკავებლად აღმოსავლეთ ფლანგზე 300 000 ჯარისკაცს გააგზავნის.
რუსეთში „ბილდის“ მიერ გამოქვეყნებულ სტატიას უკვე გამოეხმაურნენ და განაცხადეს, რომ ეს გეგმა „შარშანდელი ჰოროსკოპია“.