მსოფლიო ეკონომიკურ ფორუმზე შეკრებილი ლიდერები და ხელმძღვანელები გატაცებულნი არიან არჩევნებისა და ხელოვნური ინტელექტის საკითხით და არა უკრაინით ან ღაზის სექტორით, – წერს ამერიკული გაზეთი The New York Times-ი სტატიაში სათაურით დავოსში ომი დღის წესრიგშია, მაგრამ ძირითადი ყურადღება სხვა საკითხებს ეთმობა.
გაზეთი The New York Times-ი აღნიშნავს, რომ დავოსში ყველას სურს ისაუბროს იმაზე, თუ როგორ შეიძლება შეარყიოს მსოფლიო ხელოვნურმა ინტელექტმა და წლევანდელმა არჩევნებმა, განსაკუთრებით შეერთებულ შტატებში.
“ერთი შესაძლო ახსნა: ფორუმის მონაწილეები და ლიდერები არ განიხილავენ არცერთ ომს [უკრაინა და ღაზის სექტორი], როგორც მნიშვნელოვან საფრთხეს გლობალური ეკონომიკისთვის. აღსანიშნავია, რომ 1 500 გლობალური ლიდერის გამოკითხვაში, რომელიც ფორუმმა შეკრების წინა დღეს გამოაქვეყნა, არც უკრაინა და არც ღაზის სექტორი არ მოხვდნენ მოკლევადიან პერიოდში ძირითადი პრობლემების ათეულში”, – წერს სტატიის ავტორი.
მსოფლიო ეკონომიკური ფორუმის მთავარი ეკონომისტების მოხსენება, რომელიც მიმდინარე კვირაში გამოქვეყნდა, აცხადებს, რომ ახლო აღმოსავლეთის ზრდის პროგნოზები ოდნავ შესუსტდა ისრაელსა და “ჰამასს” შორის ომის გაურკვევლობის ფონზე, თუმცა მასში უკრაინა არ არის ნახსენები.
“დავოსის ფორუმზე კერძო საუბრებში კორპორატიულმა ლიდერებმა აღიარეს ღაზასა და უკრაინაში მიმდინარე ომები, როგორც ერთ-ერთი უამრავი პრობლემიდან. მაგრამ ისინი უფრო მეტად დაინტერესებულნი არიან სხვა თემებით, რომლებმაც, მათი თქმით, გავლენა შეიძლება მოახდინონ მათ ბიზნესზე უახლოეს პერსპექტივაში”, – აღნიშნულია სტატიაში.
“ამ სიის სათავეში ხელოვნური ინტელექტის საკითხი დგას. ინტერვიუებში კორპორატიული ხელმძღვანელები, როგორც წესი, ენთუზიაზმით საუბრობდნენ ტექნოლოგიის უპირატესობებსა და ნაკლოვანებებზე. მათ ასევე ისაუბრეს პოლიტიკაზე. კერძოდ, დაბრუნებდა თუ არა ყოფილი პრეზიდენტი, დონალდ ტრამპი თეთრ სახლში ნოემბერში და როგორ შეიძლება მისმა პოპულისტურმა, პროტექციონისტულმა პოლიტიკამ შეარყიოს ბაზრები და გაანადგუროს მათი ბიზნეს მოდელები. ზოგიერთმა კორპორატიულმა ლიდერმა ღაზა და უკრაინა გეოპოლიტიკური პრობლემების საკითხების სიაში უფრო დაბლა დააყენა, ვიდრე ამერიკის არჩევნები”, – წერს სტატიის ავტორი.
წელს “ყველა სხვა საკითხებზეა ორიენტირებული”, – განაცხადა საფრანგეთის ელჩმა საერთაშორისო ექსპორტის საკითხებში, პასკალ კანიმ. ეკონომიკურად და პოლიტიკურად, დასძინა მან, უკრაინა “კრიტიკული საკითხია”.