ვფიქრობ, უფლის სახლის დისკრედიტაცია არავინ უნდა დავუშვათ, რადგან ეს არის არამარტო ამ ინსტიტუტზე დარტყმა, არამედ საქართველოზე დარტყმა, – ამის შესახებ საპარლამენტო უმრავლესობის წევრმა ნუკრი ქანთარიამ პარლამენტის პლენარულ სხდომაზე განაცხადა.
“პატრიარქის არყოფნაში გარკვეული საფრთხე დატრიალდა საპატრიარქოს და ეკლესიის მიმართ და ამაში ბევრმა მიიღო მონაწილეობა, მათ შორის, სასულიერო პირებმაც. მე ვფიქრობ, თუ ის იდუმალების საბურველი ჩამოეცლება ეკლესიას, რის გამოც მორწმუნე და არამორწმუნეც მოწიწებით და პატივისცემით გამსჭვალულია ამ ინსტიტუტის მიმართ, მაშინ უკვე სახიფათო პროცესები დაიწყება და რეანიმაციის საშუალება მიეცემა უღმერთოთა კავშირს. ვფიქრობ, უფლის სახლის დისკრედიტაცია არავინ უნდა დავუშვათ, რადგან ეს არის არამარტო ამ ინსტიტუტზე დარტყმა, არამედ საქართველოზე დარტყმა. ჩვენი სულიერი სხეულის რღვევის საბაბი არავის უნდა მივცეთ“, – განაცხადა ქანთარიამ.
რაც შეეხება პროკურატურის მიმართ გამოთქმულ ბრალდებებს, ქანთარიას აზრით, პროკურატურამ გააკეთა ის, რაც უნდა გაეკეთებინა და საპარლამენტო უმცირესობის მოთხოვნა ირაკლი შოთაძის გადადგომის თაობაზე ღიმილისმომგვრელია.
„გადაითვალეთ მაინც ერთმანეთი, რამდენს აღწევთ ამ შემთხვევაში პარლამენტში და რამდენად გაქვთ ამ მიზნის მიღწევის საშუალება. ყველას კარგად გვახსოვს აღვირახსნილი კამპანიები საპატრიარქოს და ეკლესიის მიმართ და ვფიქრობ, ამ კონტექსტშიც შეიძლება ამის განხილვა. იმედი მაქვს, პატრიარქი ჩვეული სიბრძნით დაალაგებს იმ პრობლემებს, რამაც საპატრიარქოში თავი იჩინა, ჩვენი ზედმეტი ჩარევის გარეშე”, – მიმართა ქანთარიამ ოპოზიციას.