თედო კობახიძე – ოპოზიცია ცდილობს, პოლიტიკური შოუები მოაწყოს

თბილისის საკრებულოს იურიდიულ საკითხთა კომისიის თავმჯდომარის თედო კობახიძის აზრით, ოპოზიცია ზვიად ნაზღაიძესთან დაკავშირებულ საკითხს პოლიტიკური შოუების მოსაწყობად იყენებს.
“თუ ოპოზიცია საკითხს არასამართლებრივად თვლიდა, მას ჰქონდა ერთთვიანი ვადა, მიემართა სასამართლოსთვის, თუმცა მათ ეს არ გააკეთეს, რადგან არ ჰქონდათ იმედი, რომ საკითხი მათ სასარგებლოდ გადაწყდებოდა. გამომდინარე აქედან, ოპოზიციამ ეს ყველაფერი გადაიტანა პოლიტიკურ დებატებში და ცდილობს მოაწყოს პოლიტიკური შოუები. რაც შეეხება იურიდიული კომისიის შენიშვნებს, კი ბატონო, ჩვენ მოვითხოვეთ დამატებითი მასალები, რომლებიც უკვე წარმოდგენილი იქნა ურბანული დაგეგმარებისა და საფინანსო-საბიუჯეტო კომისიების სხდომებზე, რომლებიც ჩვენი კომისიის შემდგომ ჩატარდა. სამივე კომისიის მხრიდან საკითხის საკრებულოს სხდომაზე გატანას დადებითი რეკომენდაცია მიეცა. მე, როგორც იურიდიული კომისიის თავმჯდომარე, კიდევ ერთხელ ვაფიქსირებ, საკითხი სამართლებრივად გამართულია და მისი ბათილად ცნობა უსაფუძვლოა“, – განაცხადა თბილისის საკრებულოს იურიდიულ საკითხთა კომისიის თავმჯდომარემ თედო კობახიძემ.