რუსეთის ციხეში გარდაცვლილი, 47 წლის ოპოზიციონერის, ალექსეი ნავალნის დაკრძალვაზე 1-ელ მარტს მისულ ადამიანებს აკავებენ.
ამის შესახებ OVD-Info წერს.
მოსკოვში უკვე რამდენიმე ადამიანია დაკავებული.
კერძოდ, 4 მარტის ღამე მოსკოვის მკვიდრმა ქალმა პოლიციის განყოფილებაში გაატარა. 1-ელი მარტის ვიდეოში ის სკანდირებდა – “დიდება გმირებს”. ქალი “დაუშვებელი სიმბოლიკის დემონსტრირებისთვის” ადმინისტრაციული წესით, 1500 რუბლის ოდენობით დააჯარიმეს და გამოუშვეს.
დღეს დილით კიდევ ორი პირი დააკავეს. მათგან ერთი, ეგორ კომლევი სახლიდან გასვლისას დააკავეს და პოლიციის განყოფილებაში გადაიყვანეს, გადაუღეს ფოტო და პასპორტი წაართვეს. მას უთხრეს, რომ სათვალთვალო კამერებიდან ამოიცნეს – მამაკაცმა 16 და 17 თებერვალს ნავალნის მემორიალი ყვავილებით შეამკო, ასევე, 1-ელ მარტს მის დაკრძალვასაც დაესწრო.
მოსკოვის მკვიდრი – ელენა გრიბკოვა, რომელიც ასევე დაესწრო ნავალნის დაკრძალვას, ექსტრემიზმის წინააღმდეგ ბრძოლის ცენტრის წარმომადგენლებმა დააკავეს.