ბუნდესტაგში სტუმრობის შემდეგ, ამჯერად, პირისპირ შეხვედრა ევროკომისიის მაღალჩინოსანთან – საქართველოში ძებნილი და არაერთ დანაშაულში მსჯავრდებული ზურაბ ადეიშვილი, სამეზობლო პოლიტიკისა და გაფართოებაზე მოლაპარაკებათა საკითხებში, ევროკომისიის გენერალური დირექტორატის გენერალურ დირექტორს, გერტ იან კოპმანს შეხვდა.
სოციალურ ქსელში გავრცელდა ფოტოები, სადაც ჩანს, რომ ადეიშვილი კოპმანს უკრაინის დელეგაციასთან ერთად ხვდება.
მმართველი გუნდი კიდევ ერთხელ ამბობს, რომ ეს არის ქართული მართლმსაჯულების უპატივცემულობა და ფაქტი იმსახურებს განმარტებას გერმანიის საელჩოს მხრიდან.
პარლამენტის საპროცედურო საკითხთა და წესების კომიტეტის თავმჯდომარე ირაკლი ქადაგიშვილი მიიჩნევს, რომ ეს არის მიუღებელი, დასაგმობი ფაქტი, და იმედოვნებს, რომ საქართველოს მხრიდან შესაბამისი რეაგირება იქნება.
“ეს არის ყოვლად მიუღებელი და დასაგმობი ფაქტი, რომელსაც, ალბათ, ჩვენი მხრიდან უნდა მოჰყვეს შესაბამისი რეაგირება იმიტომ, რომ ადეიშვილი, სულ მცირე, 5 საქმეზე არის მსჯავრდებული და, გარდა კონკრეტული დანაშაულებისა, ეს არის ადამიანი, რომელმაც შექმნა სისტემა, რომელიც პირდაპირ მოწოდებული იყო იმისკენ, რომ არანაირი სამართალი არ ყოფილიყო. როდესაც ასეთ ადამიანს იღებ და მას იუსტიციის საკითხებზე და ვეიტინგის თემებზე ესაუბრები, აქედან გამომდინარე, ნათელი ხდება, თუ რას ნიშნავს ეს.
ჩვენ ვართ ქვეყანა, რომელსაც გვაქვს ჩვენი ღირსება, კონსტიტუცია, კანონები და ჩვენ თუ მივისწრაფვით ევროპისკენ, მივისწრაფვით იმიტომ, რომ იქ კანონიერებასა და სამართლიანობას ველით და არა პოლიტიკურ თამაშებს, რომელიც ლამის ჰიბრიდული შეტევების ფონზე მიმდინარეობს,“ – აცხადებს ირაკლი ქადაგიშვილი.