საგარეო საქმეთა სამინისტრომ სასწრაფოდ უნდა დაიბაროს გერმანიის ელჩი და მოსთხოვოს ახსნა-განმარტებები ზურაბ ადეიშვილის ბუნდესტაგში მიღებასთან დაკავშირებით, ასევე უნდა ვთხოვოთ ევროკავშირის ელჩს, აგვიხსნას, რა მიდგომებია ეს?, – ამის შესახებ საპარლამენტო უმრავლესობის წევრმა, ირაკლი ზარქუამ ოპოზიციაზე საუბრისას განაცხადა.
ზარქუას თქმით, მიუღებელია, ადეიშვილისნაირ ადამიანს, რომელიც საქართველოში არაერთ საქმეზეა ბრალდებული და მსჯავრდებული, დიდი ზარზეიმით ხვდებოდნენ უკრაინის წარმომადგენლის რანგში.
„გაუგებარი იყო, როდესაც ბუნდესტაგში ზურაბ ადეიშვილის ხვდებიან, როგორც ერთ-ერთი სასამართლოს და იურიდიული თემატიკის უბადლო მცოდნეს. ამ დროს არის ჩვეულებრივი დამნაშავე, კრიმინალი, რომელსაც ბრალი წარედგინა არაერთ საქმეზე. მსჯავრდებულია რობაქიძის თემაზე, მათ შორის „იმედის“ წართმევაზე, ჟურნალისტის თავდასხმაზე, ბიზნესის რეკეტზე და ასეთ ადამიანს ხვდებიან დიდი ზარზეიმით უკრაინის წარმომადგენლის რანგში. ეს მიუღებელია. ჩვენ ევროპა გვინდა, რადგან გვგონია, რომ იქ არის სამართლიანობა, მოქალაქეთა უფლებების დაცვის მეტი გარანტიები და ეს როგორ ავუხსნათ ჩვენს მოქალაქეებს? სააკაშვილის რეჟიმის ერთ-ერთი მთავარი შემოქმედი იყო ბატონი ადეიშვილი, რომელიც ძებნაშია.
გარდა ბუნდესტაგისა, ის შეხვდა ბატონ იან კომპანსს, რომელიც არის სამეზობლო გაფართოების პოლიტიკის ერთ-ერთი კომისიის დირექტორი. რა ღირებულებებზე საუბრობთ? კრიმინალი, რომელმაც ათასობით ადამიანი დაატერორა, ციხის იმ წამებების ერთ-ერთი ავტორი და შემოქმედია, იდეოლოგი იყო ამ რეჟიმის, თქვენ ასე ზარზეიმით და პატივით ხვდებით, რანაირად ავუხსნათ ჩვენს მოქალაქეებს, რომ ეს სწორია და ნორმალურია?
ამიტომ, მგონია, რომ საგარეო საქმეთა სამინისტრომ სასწრაფოდ უნდა დაიბაროს გერმანიის ელჩი და მოსთხოვოს ახსნა-განმარტებები ამ საკითხთან დაკავშირებით. ასევე ჩვენ უნდა ვთხოვოთ ევროკავშირის ელჩს, აგვიხსნას, რა თემასთან გვაქვს საქმე, რა მიდგომებია ეს? კრიმინალი ადეიშვილი ემალება გამოძიებას და ასეთ ადამიანს რომ ზარზეიმით იღებთ, რანაირად? ამის შემდეგ მოდიან და გვეუბნებიან, რომ ე.წ. ვეტინგის პროცესი იქნას გამოყენებული ჩვენი მოსმართლეების, მართლმსაჯულების მიმართ.
გამოფხიზლდით, ისედაც დევალვაცია მიდის ევროპული ღირებულებების. გაგვიჭირდება, ჩვენს მოქალაქეებს ავუხსნათ, რატომ გვინდა ევროინტეგრაცია? დიახ, ჩვენ გვინდა ის ევროპა, რომელიც დგას სამართლიანობაზე, ობიექტურობაზე, კეთილდღეობაზე, ადამიანის უფლებებზე და ნამდვილად არ გვინდა ის ევროპელი ჩინოვნიკები, რომლებიც ასე ზარზეიმით ხვდებიან ამ კრიმინალისა და რეჟიმის შემოქმედებს, რომელიც აქ სუფევდა ცხრა წლის განმავლობაში“, – განაცხადა ირაკლი ზარქუამ.